• Ja son 43 es exemplars distribuïdi en un airau de 4.900 km2 entre Catalonha, Aragon, Navarra e França.
• Nere, eth cadèth capturat ena Val d’Aran en 1998 e que hège 19 ans qu’ère enes Pirenèus atlantics, siguec aute viatge en mai deth 2017 ena zòna de Mijaran.
• Un nau cadèth a estat localizat ena Val d’Aran.
• Er os Goiat, liberat en Pallars en marc deth programa Piroslife er an 2016, a iuernat de nau ena Val d’Aran.
Imatge d’archiu der os Nere eth passat mes de mai ena zòna de Vielha e Mijaran.
Era poblacion d’ossi enes Pirenèus a arribat en 2017 as 43 exemplars identificadi entre Catalonha, Aragon, Navarra e França. Eth celh dera poblacion (41) se localize ena zòna centrau, qu’includís ua superfícia d’uns 4.000 km2 qu’abaste eth Pirenèu de Lleida e era Val d’Aran, Nauta Garona e Arièja. Concrètaments, en Catalonha, en 2017 s’an identificat 25 exemplars (10 mascles, 12 femelhes e 3 damb sèxe non identificat).
Es chifres corroboren era tendéncia ar ascens dera poblacion, qu’a anat creishent es darrèri ans, en tot passar de 31 individus eth 2014 e 32 eth 2015 a 41 eth 2016.
Imatge d’archiu der os Nere eth passat mes de mai ena zòna de Vielha e Mijaran.
Un des hèts mès estonanti a estat eth retorn deth vielh mascle Nere (neishut eth 1997, hilh de Ziva e un mascle esloven), que siguec capturat eth 1998 en Baish Aran e que hège 19 ans qu’ère en Pirenèu occidentau. Siguec fotografiat (e contrastat per mòstres genetiques) a finaus deth zel enes bòsqui de Vielha e Mijaran. Aguest hèt estonant implique era connectivitat efectiva entre es dues poblacions, maugrat era enòrma distància, e era possibilitat qu’un nau mascle non emparentat damb Pyros pogue auer deishat descendència, o ac pogue hèr a compdar d’ara.
Per çò que tanh ara reproduccion, enes Pirenèus, en 2017 an neishut 7 cadèths de 4 femelhes: 2 de Caramellita, 2 d’Isil, 2 de Plume e 1 de Chataigne. 6 d’aguesti an neishut en Catalonha; concrètaments es de Caramellita, Isil e Plume. Un des cadèths s’a localizat ena Val d’Aran, es auti en Pallars e Arièja, tanben en nuclèu des Pirenèus centraus.
Atau, ath delà des 7 naui cadèths (2 mascles, 1 femelha, e 4 damb sèxe non identificat), es 43 exemplars identificadi en 2017 se dividissen en 21 adults (7 mascles e 14 femelhes) e 15 subadults de 2, 3 e 4 ans (9 mascles, 5 femelhes e un damb sèxe non identificat).
Imatge d’archiu der os Nere eth passat mes de mai ena zòna de Vielha e Mijaran.
Totun, era abséncia de donades enes darrèri 2 ans, a hèt qu’en 2017 se donguen per desapareishudi dus individus: eth mascle Moonboots e era femelha Patoune. Per çò que tanh ath mascle Pyros, es camèras de fototrampeig lo captèren per darrèr còp a finaus de març e principis d’abriu deth 2017 en Baish Aran.
Imatge d’archiu der os Nere eth passat mes de mai ena zòna de Vielha e Mijaran.
E er os Goiat, liberat en Pallars en marc deth programa Piroslife er an 2016, dempús de passar er ostiu en França tornèc tara Val d’Aran ena tardor tà ivernar, coma ja hec eth passat iuèrn. Hè ues setmanes gessec der ivernatge e actuauments ja se tròbe en solèr francés.
Vielha, 29 de març de 2018
Conselh Generau d’Aran: Núria Sanjuan