Era Midalha d’Aur ei era maximala distincion aunorifica qu’autrege eth Govèrn aranés entà pr’amor de reconconéisher as persones e collectius que damb era sua aportacion an prestat servicis relevants ena Val d’Aran

Eth sindic d’Aran, Carlos Barrera, a liurat era Midalha d’Aur deth Conselh Generau d’Aran ath farmacèutic, Miguel Almansa, ar avocat e istoriador, Melquíades Calzado, e ath conselhèr delegat de Baqueira Beret, Jesús Serra, que tanben a recebut era distincion d’Aranés Adoptiu e illustre d’Aran.

Eth Plen deth Conselh Generau d’Aran decidic eth dia 26 de deseme de 2013, concedir es distincions aunorifiques deth Govèrn ath farmacèutic, Miguel Almansa, pr’amor qu’era sua òbra e era era sua trajectòria vitau an deishat ua peada notabla ena sanitat, atau coma ena pròpria societat aranesa. Tanben ar avocat e istoriador, Melquíades Calzado, e conselhèr delegat de Baqueira Beret, Jesús Serra, pr’amor qu’es sues òbres e es sues trajectòries vitaus an deishat ua peada notabla ena cultura e lengua, sanitat e economia, e ena pròpria societat aranesa. Serra, tanben a recebut era distincion d’Aranés Adoptiu e illustre d’Aran.

Er acte de liurament des Midalhes, que s’enmarque laguens des actes dera Hèsta d’Aran, s’a desvolopat ena glèisa de Santa Maria d’Arties, e a compdat damb era preséncia deth vicesindic prumèr d’Aran, Luís Carlos Medina, dera conselhèra de Torisme, Comèrç e Consum, Anna Díaz, deth conselhèr d’Empresa, Trebalh, Territòri, Salut e Benéster, Eduardo Valdecantos, deth president dera EMD d’Arties e Garòs, David Torres, der alcalde de Naut Aran, César Ruiz-Canela, deth senador, Francesc X. Boya, deth deputat parlamentari, Álex Moga, deth vicepresident provinciau dera Deputacion de Lleida, Pau Perdices, de Mossen Jusèp Amiell, a mès des conselhèrs generaus deth Plen deth Conselh, e alcades e presidents pedanis dera Val d’Aran.

Jèp de Montoya, cap de Cultura e Patrimòni d’Aran a manifestat “er hèr trabalhs e servicis ingents pes persones vers eth nòste país, ei quauquarren qu’a servit, e servís, entà qu’eth país foncione, visque e sigue reconeishut, e avalorat, e que toti nosati sigam fiers d’èster aciu e d’èster coma èm.”

“Er avalorar, reconèisher e aunorar tot aquerò hèt pes persones qu’an estat capables de hèc, per part d’un pòble e des sues institucions, da ua imatge de maduresa, de sutilesa, e de civisme qu’aunore autant as persones aumenatjades coma as institucions que les reconeishen” a hijut Montoya.

Jèp de Montoya a liejut eth decret de concession dera Midalha d’Aur a Miguel Almansa. Ara seguida eth sindic d’Aran, Carlos Barrera, li a liurat eth guerdon, en tot escotar era peça “Era Primauèra des Quate Estacions” d’Antonio Vivaldi, a cargue de 10 Strings (violin e violoncel).

En acabar, Montoya a liejut eth decret de concession dera Midalha d’Aur a Melquíades Calzado. Ara seguida eth sindic d’Aran, Carlos Barrera, li a liurat eth guerdon, en tot escotar era peça: “Area” de Johan Sebastian Bach.

Ara seguida, Montoya a liejut eth decret de concession dera Midalha d’Aur a Jesús Serra. Ara seguida eth sindic d’Aran, Carlos Barrera, li a liurat eth guerdon, en tot escotar era peça: “Signore delle cime” de Giusseppe Marzi.

Es tres guerdonats: Almansa, Calzado e Serra, an agut ues emotives paraules d’arregraïment entara Val d’Aran e ara sua gent.

Pera sua part, eth sindic d’Aran, Carlos Barrera, a soslinhat “aué era maxima institucion aranesa a aumenatjat a tres persones qu’an ajudat a créisher ath pòble aranés. Cada un d’eri a hèt a créisher era nòsta identitat de país.”

Er acte a finalizat damb er imne d’Aran: Montanhes Araneses.