Eth Sindic

sindic3
facebook-sindic
sindic_widget

Carlos Barrera

SINDIC D’ARAN

An de neishença: 1950 Lòc: Vielha

Trabalh entath pòble Aranés

Hè mès de trenta ans que comencè en mon dera politica, pr’amor que credí de besonh qu’auia d’implicar-me enes ahèrs dera Val d’Aran. En aguesti moments eth país ère fòrça desparièr a coma lo coneishem aué en dia. Non siguec enquiàs inicis des ans 90 qu’era Val d’Aran recuperèc era institucion deth Conselh Generau d’Aran, e per açò m’impliquè en prumèra persona, entath progrès deth país. Tot çò que s’a artenhut ath long des ans ei frut d’un trabalh fòrça dur e de luta per auançar en autogovèrn dera Val d’Aran. Se comparam era evolucion es darrèri 20 ans, veiram qu’eth Conselh Generau d’Aran a artenhut èster er organ competent en fòrça ahèrs dera societat. Tot açò non ei sonque eth trabalh des responsables politics, mès qu’era confiança des ciutadans aranesi a estat vitau entà poder certificar toti es boni resultats qu’èm satisfèti d’auer. E ara, en plen sègle XXI, èm enes pòrtes d’arténher mès autogovèrn entara Val d’Aran.

Biografia

Carlos Barrera Sánchez neishec en Vielha eth 3 de deseme de 1950. Ei actuauments eth Sindic d’Aran e president de Convergéncia Democratica Aranesa. Des de 2011 ei en cargue dempús des darrères eleccions municipaus.

Comencèc a trabalhar en FECSA en 1969 en Barcelona, abantes de demanar eth traslat en 1974 tara Val d’Aran. Ans mès tard començarie a interessar-se pera politica. Era implicacion de Carlos Barrera en entorn sociau dera Val d’Aran, s’inicièc damb eth cargue de president dera Societat de Caça e Pesca, ja que Barrera cre qu’era esséncia des aranesi amants dera practica dera caça e era pesca forme part des drets istorics coma pòble e des d’aguest moment era gestion dera activitat se defenec des dera Val d’Aran. Abantes de qu’era Generalitat li transferisse ath Conselh Generau d’Aran aguestes competéncies, des dera Societat de Caça e Pesca dera Val d’Aran auien dejà arribat a acòrds que permetien era gestion des rius e montanhes des dera Val d’Aran. Siguec en 1997 quan s’artenhec aguesta competéncia. En 1991 s’artenhec era competéncia de cultura damb es prumèrs passi deth Conselh Generau d’Aran. En 1995 Carlos Barrera siguec escuelhut coma Sindic d’Aran dempús des eleccions municipaus. Substituïc en cargue a Amparo Serrano. Cargue qu’aurie pendent 3 legislatures consecutives, enquiàs eleccions municipaus der an 2007.Damb eth, a compdar de 1997, eth Conselh Generau d’Aran a artenhut era transferéncia de competéncies dera Generalitat de Catalonha, qu’aufrissen un autogovèrn important ara Val d’Aran laguens de Catalonha. Dempús de 4 ans coma cap dera oposicion, tornèc a èster escuelhut coma maxim representant politic dera Val d’Aran enes comicis locaus er an 2011. Succedic en cargue a Francés X. Boya. Er an 2012, pendent eth 2au congrès de Convergéncia Democratica Aranesa, siguec reelegit coma president deth partit.

Caractèr

Apassionat dera montanha ei aquiu a on desconnècte e medite es ahèrs pendenti damb tranquillitat. Negociador fèrm, trabalhador infatigable, afable e tostemp atent, encara que testut e rigid, destacat deth poder ei considerat ua persona extrèmaments trabalhadora, simpla e aunèsta, a on era familha e es amics aucupen un lòc principau ena sua vida. Respècte as sues idees politiques aparten a ua categoria de nacionalistes que se preocupe peth sòn pòble coma ua entitat concrèta e reauments existenta.