Baqueira Beret siguec eth scenari deth gran ambient que i auec ena prumèra pròva deth circuit Copa Espanha Mastèrs

En ua dimenjada totauments iuernau e ena quau se celebraue eth World Snow Day dera Federacion Internacionau d’Esquí (FIS) mès de 100 mastèrs de tota Espanha participèren ena carrèra mès animada deth circuit. Eth Club Aranés Espòrts d’Iuèrn (CAEI) amassa damb era RFEDI e era FCEH damb eth patrocini d’AC Otèls by Marriott organizèren un eveniment que vò mercar era pauta deth futur des carrères d’esquí aupin entà majors de 30 ans: era diversion amassa damb era competicion.

Eth Gigant deth dissabte se disputèc ena part nauta de Beret damb un gran trabalh per part dera estacion e dera organizacion entà méter en marcha aguest eveniment en tot tier en compde era fòrta nheuada enregistrada des deth diuendres. Se disputèren dues manges damb corredors tant damb licéncia de competicion coma esquiadors ena categoria Open.

Eth dissabte pera tarde es mastèrs s’amassèren en otèl AC Baqueira Autograph Collection a on se hec eth despartiment de prèmis e ath delà gaudiren der aperitiu e dera musica en dirècte que non se podec realizar enes pistes a causa dera meteorologia.

Damb era intensificacion dera nheuada deth dimenge e des bohades de vent enes zònes nautes non siguec possible disputar er Eslalom previst mès demoren encara tres intenses dimenjades de circuit.

Es esquiadors que s’inscriuen enes carrères mastèrs son ex-corredors, mès tanben esquiadors de torisme que s’an vist sedusidi pera competicion. Maugrat açò, çò que mès anime ad aguesti esportistes de mès de 30 ans ei eth gran ambient que se viu en aguesti eveniments, tant eth companherisme coma era hèsta que s’organize.

Es resultats des corredors deth CAEI sigueren es següents:

MONTSE PUIGREFAGUT: 2au GS ena categoria F3
RAFAEL RUANO: 2au GS ena categoria M4

Vielha, 17 de gèr de 2017

Conselh Generau d’Aran: Núria Sanjuan

Hònt e Fotos: CAEI