Eth Plen deth Conselh Generau d’Aran a aprovat aué era convalidacion des mesures entà hèr front ath deficit public, en aplicacion deth RD-Lei 8/2010, de 20 de mai. D’aguesta forma, eth Conselh hèr efectives es mesures que se deriven des decrèts aprovats peth Govèrn centrau e era Generalitat entara reduccion salariau ena maxima institucion aranesa, Torisme Val d’Aran e eth Servici Aranés deth Benèster e era Salut. 

Era naua entitat de Pompièrs e Emergéncies dera Val d’Aran comence a caminar. Per prumèr viatge, s’a amassat eth Conselh d’Administracion deth nau organisme prebotjat peth Govèrn aranés entà gestionar es servicis de prevencion, escandiment de huecs, transpòrt sanitari e de sauvament e rescat, atau coma tot eth personau de pompièrs deth Conselh, es pompièrs volentaris e es professionaus de Transpòrt Sanitari dera Val d’Aran (TESVA).

Es talhèrs de teatre qu’eth Departament de Cultura e Politica Lingüistica deth Conselh Generau d’Aran a organizat d’ençà d’enguan an artenhut fòrça exit de participacion, segontes se despren des donades qu’a dat a conéisher aué era cap de Cultura e Politica Lingüistica, Maria Vergés. Un totau de 35 persones an participat en aguesti talhèrs, que dejà se tròben ena dusau edicion.

Eth sindic d’Aran, Francés Boya, e eth conselhèr de Torisme, Comèrç e Transpòrt, Juan Antonio Serrano, an recebut aguesta tarde ar equip de bàsquet CAI Saragossa, que se tròbe de stage de concentracion ena Val d’Aran, a on demorarà enquiath pròplèu dissabte entà realizar un trabalh especific de montanha. Aguesta estada compde damb era collaboracion deth Conselh Generau d’Aran e Torisme Val d’Aran. Era recepcion oficiau a agut lòc ena sedença dera maxima institucion aranesa.

Eth Conselh facilite eth transpòrt gratuït entàs mainatges

Un totau de 160 mainatges e mainades, de 3 a 12 ans, e 27 monitors des casals d’ostiu (Calandretes de Les e Vielha, Deportur, CAEI, Mon Actiu, Alps Aranesi, Palai de Gèu e Pati de Garòs) participèren era setmana passada ena hèsta de clausura dera sason de 2010, en un acte organizat pera Oficina de Joenessa deth Conselh Generau d’Aran. D’aguesta forma, se dèc per concludida era sason d’ostiu pendent era quau an lòc diuèrses activitats de léser. Era hèsta auec lòc ena piscina municipau de Salardú, a on se compartiren jòcs, aventures e tot tipe d’animacion.

Auràn lòc tanben es 3aus Jornades Gastronomiques de Caça, es dies 3, 4 e 5 de seteme

Eth Conselh Generau d’Aran torne a organizar enguan, per dusau viatge consecutiu, era hèira dera caça Caçaran 2010, dempús der èxit arremassat ena prumèra edicion de 2009. Aguesta hèira pionèra se celebrarà amassa damb es 3aus Jornades Gastronomiques dera Caça, tanben organizades peth Conselh e Torisme Val d’Aran per miei dera secretaria tecnica d’Evalia. Andús eveniments auràn lòc es dies 3, 4 e 5 de seteme.