SUPÒRT D’ICV ENTARA MELHORA DETH RÈGIM ESPECIAU

Eth sindic d’Aran, Francés Boya, a recebut aué a ua delegacion deth grop d’Iniciativa per Catalunya Verds – Esquerra Unida i Alternativa en Parlament entestada peth sòn pòrtavotz, Jaume Bosch, ena prumèra visita qu’un grop parlamentari realize entath Conselh Generau damb era finalitat d’abordar era actualizacion e melhora dera lei sus eth règim especiau. Ena amassada, Francés Boya a emplaçat a elaborar era naua Lei d’Aran “damb eth maximom consens possible”. Entad aquerò, a rebrembat qu’es grops deth Conselh Generau e eth Departament de Governacion dera Generalitat son en plen procès de debat entà reformar eth tèxte legau. En aguesti moments, era comission dera part aranesa, formada pes fòrces politiques deth plenari e tres juristes de reconeishut prestigi, an trabalhat amassa ena elaboracion d’un brolhon, que se tròbe en periòde d’esmènes, damb era finalitat de consensuar un projècte de lei damb eth govèrn catalan. Un còp definit, eth Conselh Generau “daurirà un procès de participacion ciutadana” entà arténher era concertacion dera naua lei damb es ajuntaments, entitats e persones que ne volguen formar part, segontes a anonciat eth Sindic.
 

Pera sua part, Jaume Bosch a declarat qu’Iniciativa (ICV) prepause qu’eth Conselh Generau se pogue relacionar dirèctament damb un Departament dera Generalitat “damb mès pes institucionau”, coma es dera Presidéncia, Vicepresidéncia o Relacions Institucionaus, en lòc de formalizar-la damb eth de Governacion. Eth dirigent ecosocialista enten qu’era maxima institucion non pòt concretar es sues relacions damb era conselheria de Governacion e Administracions Publiques, pr’amor qu’eth Conselh Generau “non ei un ens locau”. Bosch a hijut qu’eth nau redactat a de preservar era “relacion istorica entre Aran e Catalonha”.

Eth Sindic e eth pòrtavotz d’ICV an coincidit en considerar “dus possibles escenaris” ena futura division territoriau de Catalonha, en tot depéner de s’es naui ens territoriaus substituiràn o non es actuaus províncies. “Atau coma Aran forme part d’ua província pr’amor qu’atau ac establís era Constitucion, eth Conselh Generau exprèsse era sua negacion entà que se l’includisque en ua vegueria en tant que forma catalana d’organizacion territoriau que non suprimís era província”, atau coma a explicat Boya, qu’a reiterat eth sòn compromés entà qu’Aran “non sigue includit en cap de division territoriau que non sigue eth madeish”. Entà Bosch, “cau hèr compatibles eth dret d’Aran ara sua singularitat e organizacion territoriaus e eth de Catalonha entà organizar-se en vegueries”, tostemp qu’implique “ua simplificacion” der entramat administratiu.