Eth Conselh Generau d’Aran exprèsse era sua mès sentida condolença pera desaparicion de Robèrt Lafont, que mos deishec ager, 24 de junh, ena vila de Florença entàs 86 ans d’edat, e atau la’c vò hèr a arribar ara veuda, as hilhs, a toti es amics e companhs. Robèrt Lafont a representat era figura der òme culturau totau qu’a destacat, especiaument, pera sua consciéncia e activisme occitanista des d’un punt d’enguarda scientific e de creacion literària. Òme culturau totau, açò vò díder, escrivan, dramaturg, poèta, pensaire, lingüista, sociolingüista, professor umanista, ideològ e ciutadan compromés. Eth Govèrn d’Aran considère irreparabla entàs letres e era cultura occitana era desaparicion deth que siguec un des fondadors der Institut d’Estudis Occitans (IEO) e un des mès grans divulgadors dera realitat occitana en toti es sòns encastres.