.gif)
.jpg)
.jpg)
.jpg)
| Eth sindic d’Aran liure era naua prepausa de lei de regim especiau ath conselhèr de Governacion |
|
|
| Deluns, 13 de Junhsèga de 2009 | |
|
En nòm dera delegacion aranesa entara naua lei d’Aran, eth sindic Francés Boya a hèt entrega, aguest maitin, dera prepausa de projècte de lei sus eth regim especiau dera Val d’Aran ath conselhèr de Governacion e Administracions Publiques, Jordi Ausàs. D’aguesta forma, es grops damb representacion en Conselh Generau d’Aran (UA, CDA e PRAG), per miei des sòns pòrtaveus, an formalizat eth liurament dera prepausa qu’an consensuat amassa pendent eth darrèr an e miei entà pr’amor d’actualizar e mielhorar er autogovèrn dera Val d’Aran, atau coma establís er Estatut de Catalonha de 2006, ena sua disposicion addicionau cincau.
En acte qu’a agut lòc ena sedença de Governacion, en Barcelona, eth Sindic s’a refertit ath “moment istoric” que viu Aran per miei d’aguesta “naua oportunitat entà mielhorar eth benèster dera sua gent”, e a aperat ara “generositat deth pòble catalan” entà elevar er autogovèrn e era reconeishença d’Aran “en ensem de Catalonha, er Estat e Euròpa”. Atau madeish, a destacat “era soleta veu” damb era quau se presente era prepausa “en nòm deth pòble aranés”, e a rebrembat eth “simbolisme” que represente eth liurament en un 13 de junhsèga, dia en qué s’aprovèc era lei vigenta de regim especiau. Francés Boya (UA) a estat acompanhat des pòrtaveus conselhèrs Carlos Barrera (CDA) e José Antonio Bruna (PRAG), atau coma de d’auti conselhèrs generaus e des ponents deth projècte de lei.
|
