Eth sindic d’Aran se felicite peth “compliment” des compromisi entà mielhorar era C – 28
 

Eth conselhèr de Politica Territoriau e Òbres Publiques, Joaquim Nadal, a anonciat aué en Parlament era pròplèu licitacion des òbres de mielhora deth tram de Salardú a Vaquèira (C – 28) per 4,5 milions d’èuros, prevista a compdar deth pròplèu mes de noveme. D’aguesta forma, eth Govèrn dera Generalitat concrète eth sòn compromís entà auançar ena reforma dera via en aguest tram fòrça deteriorat, dempús d’auer segregat deth projècte globau era mielhora especifica der accès ara estacion d’esquí dera Val d’Aran.
 

En aguest sens s’a manifestat eth sindic d’Aran e deputat en Parlament, Francés Boya, satisfèt peth “compliment” der acòrd ath quau auien arribat era Generalitat e eth Conselh Generau d’Aran hè uns mesi entà iniciar de forma urgenta eth procès qu’a de perméter mielhorar aguesta infraestructura “tan importanta entàs comunicacions e era competitivitat dera economia aranesa”, dempús de “decades en qué era sua mielhora auie demorat desbrembada coma prioritat de govèrn”.