Mès de 20.000 persones se dèren cita dissabte en Carcassona entà reivindicar era lengua occitana jos eth lèma Anem Òc! Pera lengua occitana!, qu’a compdat, un an mès, damb ua representacion aranesa, per miei dera iniciativa deth collectiu Lengua Viua damb eth supòrt deth Conselh Generau d’Aran.
 

Vengudi de diuèrsi lòcs des tèrres occitanes atau coma des païsi catalans – valencians, es manifestants an recorrut eth centre de Carcassona enquiara vila fortificada, a on s’an liejut es manifèsti reivindicatius per part des organizadors. Eth sindic d’Aran, Francés Boya, qu’i a assistit, a volut significar era solidaritat d’Aran respècte dera Occitània grana en tot demanar as autoritats franceses eth reconeishement explicit der occitan coma lengua pròpria de mès d’un milion de ciutadans, e a defenut eth modèl dera Val d’Aran coma modèl d’integracion e diversitat en ua autonomia que reconeish eth valor dera lengua coma era expression mès prigona d’un territòri e coma forma d’enriquiment collectiu.