Eth Conselh avalòre es solucions aportades en respectar er interès generau

Era comission territoriau d’Urbanisme a aprovat era modificacion des Normes subsidiàries de Naut Aran qu’afècten ara Unitat d’Actuacion en sòl urban de Ruda (UA – 2), en tot garantir es accèssi e es infraestructures dera estacion Baquèira – Beret en aguest airau. Urbanisme inste ar ajuntament a balhar ua naua licéncia unica damb es condicions que recuelh era propòsta, que sage de dar compliment ara senténcia deth Tribunau Superior de Justícia de Catalonha, qu’anullèc en abriu era licéncia otorgada en 2004.
 

D’un aute costat, era comission a dat lum vèrda ara redubertura dera estacion de Tuca, er acòrd dera quau non serà vigent enquia que s’apròve definitivament eth plan especiau deth domèni esquiable, eth quau a d’includir era concession administrativa e es garanties economiques dera sua execucion.

Eth sindic d’Aran, Francés Boya, s’a mostrat satisfèt per qu’Urbanisme age desbloquejat dus “ahèrs d’extrema importància entath desvolopament d’Aran”. “Era incertesa creada en Ruda auesse podut méter en risc es infraestructures de besonh entar accès ara estacion”, a explicat. Eth Govèrn aranés enten qu’es acòrds prenudi aué ena comission “son favorables ar interès generau”.

Ruda

Era comission d’Urbanisme garantís es accèssi ath telecabina e reconeish es 1.500 places de parcatge. Era propòsta aprovada incremente en 2.500 mètres carrats er espaci public destinat a sistèma viari e infraestructures, qu’actuaument son computadi coma sòl privat. Aguesta reorganizacion, qu’anarà a cargue deth sector, se dedusís d’espaci non bastit e compòrte er esbauç des installacions d’us administratiu e comerciau dera basa deth remontador e eth sosterrani. Tanben se permeten naui usi complementaris (comerciau, d’oficines, sanitari assistenciau, educatiu, eca.) que fomenten era activitat economica.

Tuca

Tanben s’a desbloquejat eth procès qu’a de perméter tornar a daurir era estacion de Era Tuca, dempús qu’Urbanisme instèsse ar ajuntament de Vielha – Mijaran a priorizar eth desvolopament des equipaments e es infraestructures e era continuïtat dera trama urbana. Era naua propòsta a incorporat es prescripcions der acòrd dera comission deth mes de mai. Totun, Urbanisme condicione era execucion deth projècte ath plan especiau des pistes de Tuca, qu’aurà d’includir era concession administrativa e era concrecion dera sua implantacion (còsti e plan d’etapes).

Cambi de tràmit

Era comission d’Urbanisme a retornat as ajuntaments de Naut Aran e Vielha – Mijaran andús projèctes entà adequar-les ara tramitacion urbanistica corresponenta, que, enes dus cassi, ei un plan especiau. En cas de Naut Aran, era installacion deth telesèra Saumet s’aurà de formular per miei d’un plan especiau urbanistic, conjuntament damb eth projècte de pistes, que poiràn aprovar-se ena primauera. Era propòsta der ajuntament s’includie enes supòsits d’actuacions en sòl non urbanizable, coma installacions entà ua activitat esportiva e de léser. Vielha tanben aurà de tramitar un plan especiau entath bastiment d’un centre d’emmagazinatge e distribucion de gas propan en Escunhau – Casarilh, promoigut per Repsol Butano S.A.