Inversions per valor de 430.000€ entas depuradores dera Val d’Aran

Vielha, 22 de junh de 2018.- Era enterpresa explotadora des EDARS (Estacions Depuradores d’Aigües Residuaus) dera Val d’Aran Sorigué-SAV-DAM a executat es dues prumères fases d’un plan de modernizacion damb ua inversion de 433.000 € entara melhora deth foncionament, conservacion e mantenença d’aguestes infrastructures

Es inversions s’an amiat a tèrme dempús qu’era enterpresa realizèsse ua auditoria der estat des equipes e es installacions damb era que s’elaborèc un informe liurat ath Conselh Generau d’Aran damb es deficiéncies detectades.

Damb aguestes donades s’establic era priorizacion des accions mès urgentes a amiar a tèrme e eth programa d’execucion des apariaments e melhores entath bon foncionament des EDARS, ua part des que n’an estat executades per part dera Agéncia Catalana der Aigua (ACA) a cargue deth hons de reposicion e melhores entà er an 2018.

Es inversions que s’an amiat a tèrme an permetut era melhora des sistèmes informatics dera gestion eth temps reau a trauès des ordenadors des EDARS, atau coma er apariament des difusors d’oxigenacion des reactors entara melhora der aire enes depuradores de Vielha e Naut Aran e melhorar-ne era eficiéncia.

Er aguest sentit eth sindic d’Aran, Carlos Barrera, a manifestat qu’es inversions hètes per part de Sorigué-SAV-DAM en sistèma informatic e ena milhora dera eficiéncia des depuradores harà que siguen mès foncionaus e eficientes, donques a dit que en cas dera depuradora de Vielha era sua antiquitat ei de 18 ans e era de Naut Aran de 10 ans.

Es EDARS dera Val d’Aran son en Bossòst, Canejan (nòrd e sud), Les, Naut Aran (Bagergue) e Vielha e Mijaran (Escunhau). Ath long d’aguesti ans s’an anat en tot incorporar d’autes estacions depuradores d’aigües residuaus ath sistèma coma son es de Naut Aran (Garòs), Vielha e Mijaran (Vielha), Aubèrt e Arròs.

En conjunt, es dètz plantes pòden dar cobertura a 33.000 abitants equivalenti e tractar mès de 13.000m3/dia. Es sistèmes principaus son era EDAR de Vielha, damb ua capacitat de tractament de 4.560m3/dia, que da servici a 10.260 abitants equivalenti, e eth sistèma dera EDAR Naut Aran que pòt tractar un cabau mejan de 5.856m3/dia, damb capacitat entà dar servici ath delà de 13.000 abitants equivalenti.

 

Eth plan de modernizacion des EDARS dera Val d’Aran se realizarà en tres ans e ei previst que s’i destine ua inversion totau d’un milion d’èuros.

 

Comments are closed.