Vielha, 13 d’abriu de 2018.- En tot acabar era sason d’esquí, es mainatges e mainades des escòles ZER (Zòna Escolara Rurau) Val d’Aran participèren en ues jornades organizades amassa damb eth Centre de Prediccion de Lauegi deth Conselh Generau d’Aran en Pla de Beret, entà arténher sus eth terren coneishences basiques sus es lauegi, atau coma mesures de prevencion e seguretat entà desvolopar-se ena nhèu.

Aguest ei eth dusau an qu’era equipa deth Centre de Prediccion de Lauegi amie a tèrme aguesta iniciatiua conjunta damb es escòles dera Val d’Aran.

Es escòles ZER Val d’Aran son era Escòla Loseron d’Arties, era Escòla Ruda de Salardú e Escòla Sant Martí de Gessa en Naut Aran e era Escòla Casteth Leon d’Es Bòrdes.