• Aué s’a celebrat en Plan de Beret era 36au Marxa Beret, cita classica des espòrts d’iuèrn der estat espanhòu, qu’enguan calec ajornar-se eth passat 1 de hereuèr a causa des intenses nheuades.

• Era Marxa a compdat damb uns 400 participants.

• Era hondista catalana dera equipa nacionau, Laura Orgué, a arrecebut un aumenatge per’mor que dempús de disputar era Marxa Beret s’a retirat dera nauta competicion.

• Pòdis entàs aranesi Ruben Caseny, Oriol Llarden, Carla Badía e Zoe Sanllehy.

• Eth joen aranés, Pol Vidal, acabe en ua meritòria cincau posicion enes 42 Km.

Foto: Fototur

Dempús d’ajornar-se eth passat 1 de hereuèr a causa des intenses nheuades, uns 400 hondistes s’an dat cita aué en Plan de Beret entara 36au Marxa Beret, era chifra d’inscripcions a estat menor en çò que tanh ara de hereuèr, a on se superèren es 1.000 inscriti. Es distàncies an estat es abituaus: 10, 21 e 42 km peth Plan de Beret, e en coïncidir damb era Marcha Naut Aran s’an somat es distàncies de 5 e 2 km. Es recorreguts de 21 e 42 km an baishat enquiath pòble de Montgarri. Es auti recorreguts mès cuerti e populars, s’an realizat pera zòna de Beret damb un perfil mès facil sense grani desnivèus e fòrça adequat entà hè’c en familha.

Corredors d’elèit dera equipa nacionau espanhòu e estrangèrs: alemands, finlandesi, noruecs, russi, italians, francesi… Non s’an volut pèrder era cita, atrèti per èster ua marcha populara includida en calendari FIS (Federacion Internacionau d’Esquí) de longues distàncies e en calendari Euroloppet (Circuit Europèu) de marches populares.

Laura Orgué.  Foto:Fototur

Entre es corredors nacionaus a destacat era participacion dera hondista catalana, Laura Orgué, que dempús de disputar aguesta edicion dera Marxa Beret a penjat es esquís. Era catalana, de 28 ans, a deishat era competicion dempús d’anar a tres Jòcs Olimpics d’Iuèrn (Turin 2006, Vancouver 2010 e Sochi 2014), en tot arténher ena cita russa d’est an passat un brilhant detzau lòc enes 30 quilomètres gessuda en massa, eth melhor classament d’ua hondista espanhòla en un eveniment olimpic.

Eth president dera RFEDI er aranés May Peus, era hondista Laura Orgué, e eth vicesindic d’Aran e director dera Marxa Beret, Luís Carlos Medina, en aumenatge que se li a hèt a Orgué qu’a deisaht era nauta competicion. Foto: Fototur

Eth president dera Reau Federacion Espanhòla d’Espòrts d’Iuèrn (RFEDI) er aranés, May Peus, a mostrat eth sòn supòrt a Orgué en aguesta decision, “ei ua pena que Laura ac dèishe per’mor qu’ei era melhor hondista espanhòla de toti es tempsi coma demostrèc en Sochi. Laura ei eth referent entàs joenes generacions”. Pera sua banda, Luís Carlos Medina, vicesindic e conselhèr d’Espòrts d’Aran, e director dera Marxa Beret, a volut arregraïr a Laura Orgué era sua preséncia ena Marxa Beret. En tot finalizar era corsa, Laura a arrecebut un caud aumenatge per part des organizadors dera Marxa Beret.

Pòdi masculin des 42km. Foto: Fototur

En çò que tanh as resultats, ena categoria masculina ena distància de 42 Km., eth guanhador a estat, Josu Erkizia, dera equipa VASCO DE CAMPING, damb un temps de 02:21:23. Sadurní Betriu, deth CEFUC, a finalizat ena dusau posicion coma ena anteriora edicion dera Maxa Beret e er aranés, Ruben Caseny, deth CAEI, tresau. Eth tanben aranés, Pol Vidal, der ARAN NÒRDIC E.C, a finalizat cincau.

Pòdi femenin des 42Km. Foto: Fototur

Ena categoria femenina de 42 Km., era guanhadora a estat Laura Orgué, dera equipa SALOMON, damb un temps de 02:39:43, seguida de Bea Blanes, deth MAYENCOS, dusau e de Marielle Bigot, qu’a finalizat tresau.

Ena rèsta de categories, eth guanhador de 21 km categoria masculina, a estat Fabien Beaufis, damb un temps de 01:12:20, er aranés Oriol Llarden, der ARAN NÒRDIC E.C, a finalizat dusau, e Josu Zarranz, tresau.

Era guanhadora de 21 km., a estat Isabel Pla, deth MAYENCOS, damb un temps de 01:30:57, Marta Folch, deth PEC e Aintzane Fayanas, dusau e tresau respectivaments.

Ena distància de 10 km, eth guanhador a estat Jorge Saura, der AD HOSPITAL BENASQUE, damb un temps de 0:36:26, dusau a estat Jordi Majoral, deth CEFUC, e tresau Merlin George, deth SC FTROMEUP2.

Pòdi des aranesi. Foto: Fototur

Ena categoria femenina de 10 Km, era guanhadora a estat era joena aranesa Carla Badía, deth CAEI, damb un temps de 0:43:49. Ena dusau posicion a finalizat era tanben aranesa Zoe Sanllehy, deth CAEI, e tresau, Mònica Felipó, deth CEFUC.

Autoritats. Foto: Fototur

Luís Carlos Medina, vicesindic e conselhèr d’Espòrts d’Aran, e director dera Marxa Beret, s’a mostrat fòrça arregraït damb era organizacion dera Marxa Beret que dempús d’auer-se ajornat en hereuèr s’a pogut celebrar aué. Medina a soslinhat qu’“era Marxa Beret s’a assolidat coma un eveniment de maximala importància entà esportistes d’elèit, tant nacionaus coma europèus, e entà familhes que vòlen vier a gaudir. Açò mos da energia de cara ara organizacion des Campionats d’Euròpa deth 2016 qu’auràn lòc ena Val d’Aran.”

Eth vicesindic d’Aran, conselhèr d’Espòrts e director dera Marxa Beret, Luís Carlos Medina, damb es Volentaris d’Aran. Foto: Fototur

Un an mès, es organizadors dera Marxa Beret, an arregraït eth trabalh des Volontaris d’Aran, sense es quaus era organizacion dera Marxa non auesse estat possibla.

Foto: Fototur.

Era Marxa Beret l’organize eth Conselh Generau d’Aran, Baqueira Beret e er Ajuntament de Naut Aran, damb era collaboracion de: Associacion Volentaris Val d’Aran, Audi, Foment Torisme Val d’Aran, Deputacion de Lhèida, Ajuntament de Vielha e Mijaran, Salomon, la Caixa, Powerade, Xchanging, AECC, Roche- Posay, Coca-cola, Pompièrs d’Aran, Aran Salut, Mòssos d’Esquadra, INS d’Aran, Montgarri Outdoor, Hormaran, Construcciones Pena, ath delà dera Reau Federacion Espanhòla d’Espòrts d’Iuèrn (RFEDI) e era Federacion Catalana d’Espòrts d’Iuèrn (FCEH).

Foto: Fototur

Mès informacion e classaments en: www.marxaberet.com.