Lectura deth Manifèst contra era Violéncia de Genre

Aué pera tarde se projectarà un documentau e se darà informacion sus eth Protocòl d’intervencion dera Violéncia de Genre ena Val d’Aran.

 

DSC_0162

 

Aué damb motiu deth Dia Internacionau contra era Violéncia de Genre, era conselhèra de Torisme e Desvolopament Economic d’Aran, Anna Díaz, a liejut ena sedença deth Conselh Generau d’Aran eth Manifèst contra era violéncia de genre.

En paraules dera conselhèra Anna Díaz, “des deth Govèrn d’Aran, auem era obligacion de crear consciéncia collectiva sus aguesta violacion tan flagranta des drets umans. De contunhar, en tot comprometer-mos, a balhar especiau atencion e dedicacion tà eradicar era violéncia contra era hemna, mejançant eth compliment des objectius en egalitat de genre, desvolopament e patz. Èm aciu entà demanar-vos de junher-vos ad aguest manifèst coma simbèu d’arrefús ad aguesta lacra sociau qu’empraubís era nòsta societat; Que denoncietz e condemnetz, e que proclametz que cap hemna a d’èster mautractada donques non existís cap de justificacion. Perque, cada dia ei ua naua oportunitat entà qu’ amassa, concentrem era nòsta luta contra aguesta crua realitat”.

Díaz a hijut “voi arregraïr eth trabalh realizat pes institucions implicades ena atencion e prevencion dera violéncia de genre, Mossos d’Esquadra, entitats judiciaus, es professionaus sanitaris, eth Servici d’informacion e Atencion ara Hemna, Servicis Sociaus, es Centres Educatius, Cáritas, entitats e associacions de hemnes”.

Eth Conselh Generau d’Aran, per miei deth Servici d’Informacion e Atencion ara Hemna (SIAH), commemòre eth Dia Internacionau contra era violéncia de genre damb diuèrsi actes. Aué, 25 de noveme entàs 20:00 ores ena sedença deth Conselh Generau, aurà lòc era projeccion deth documentau “La maleta de Marta”, a on se mòstre era luta d’ua hemna mautractada e de quaiqui òme qu’an estat agressors e seguissen un programa de reabilitacion. Ara seguida e entà barrar es actes commemoratius, en Conselh entàs 21:15 ores, i aurà informacion sus eth Protocòl d’intervencion dera Violéncia de Genre ena Val d’Aran.

Tanben enquiath 9 de deseme s’impartís un cors d’autodefensa en Palai de Gèu de Vielha.

Comments are closed.