Onze arreconeishudi restaurants aranesi presenten menús damb eth caviar que s’elabòre ena Val d’Aran.
Eth caviar se tròbe laguens dera Marca Garantia Val d’Aran.
Deth 3 ath 23 de març, onze restaurants aranesi an previst surprene as sòns clients damb menús enes quaus eth caviar serà eth protagonista. Era Setmana deth Caviar a coma intencion potenciar aguest producte que s’elabòre ena Val d’Aran des der an 1999 e qu’a ja obtengut era reconeishença de codinèrs e gastronòms. Es menús van des 45€ as 70€.
Es restaurants que participen son: Era Mòla (Vielha), Eth Triton (Arties), Roc’n’Cris (Aubèrt), Er Occitan (Bossòst), Era Coquèla (Vielha), Eth Bistro (Vielha), Gin Loe (Baqueira), AC Hotels (Baqueira), Es Arraïtzes (Garòs), La Fonda (Vielha) e Pirineu Gourmet (Arties).
Enes sòns menús seràn presents eth caviar e er esturion codinat en totes es sues formes. De suggeridors entrants coma eth Velouté de ligombau, fenolh e caviar Nacarii o eth Maki d’avocat lagostins e esturion, enquia plats mès contondenti coma eth Tsukune d’esturion fresc dera Val d’Aran o eth Suquet Thai de lom d’esturion damb gamba vermelha e misharnons.
Tanpòc mancaràn dessèrts doci qu’incorpòren aguest benvolut producte coma era Mousse de chicolate blanc, doç de lèit e caviar Nacarii o er Artifici de faus Caviar.
Activitats alternatives
Es experiéncies culinàries se pòden acompanhar d’autes activitats. Entre eres se prepause ua visita ara factoria de Les entà conéisher era istòria e procès d’elaboracion, degustar caviar ena botiga deth centre de Vielha o immergir-se enes aigües deth balneari Termes Baronia de Les e conéisher es tractaments elaboradi damb caviar dera Val d’Aran.
Eth mes deth caviar ei organizat peth Conselh Generau d’Aran, damb era collaboracion de Caviar Nacarii e eth Grèmi d’Ostalaria dera Val d’Aran.
Sabor autentic e fresc
Eth caviar aranés Nacarii, qu’a obtengut era reconeishença de codinèrs e gastronòms peth sòn sabor autentic, frescor, puresa e transparéncia, s’includís laguens dera Marca Garantia Val d’Aran. Procedent des aigües heiredes, pures e cristallines deth desgèu der arriu Garona, eth caviar Nacarii, s’elabòre de manèra artesanau e damb metòdes tradicionaus ena piscifactoria plaçada en municipi de Les.
“Damb aguest tipe d’eveniment çò que volem ei potenciar eth torisme gastronòmic damb productes elaboradi ena Val d’Aran” a manifestat Anna Díaz, conselhèra de Torisme e Desvolopament Economic d’Aran.
Mès informacion e menús: llibret setmana del caviar 2017 blanc
Vielha, 17 de hereuèr de 2017
Conselh Generau d’Aran: Núria Sanjuan