Vielha, 21 de març de 2018.- Eth Centre d’Entrepreses Innovadores CEI Val d’Aran de Casau comence eth pròplèu mes d’abriu eth nau cicle de corsi e capsules formatiues gratuïtes adreçades ara poblacion en generau qu’organize damb era collaboracion de GLOBALleida, damb eth supòrt deth Conselh Generau d’Aran e dera Deputacion de Lhèida.

Eth CEI Val d’Aran a principauments dues linhes de trabalh. Per ua banda, dar era oportunitat de desvolopament de naues activitats empresariaus en tot acuélher enes sues installacions enterpreses innovadores o restacades damb es naues tecnologies, e d’autra banda sostier ath teishut empresariau deth territòri mejançant era transferéncia tecnologica e melhora des hilats de cooperacion entre enterpreses e particulares, qu’ei a on s’includís era aufèrta de corsi e capsules formatives.

Era naua prepausa de corsi e capsules entath 2018 contemple corsi de creacion de botigues online mejançant WordPress e Wocommerce, hilats sociaus e marqueting digitau entà comèrci e negòcis, aufèrta de servicis a trauès de web, atau coma de formacion sus era excelléncia ena atencion ath client, convertir era passion en profession o conéisher es tendéncies deth mercat laborau entà èster un candidat competitiu, e d’autes adreçades dirèctaments as autonòms sus coma gerir es impòsti e sus coma redusir còsti.

Eth prumèr des corsi començarà eth 19 d’abriu er orari de maitin des 10 as 14 ores, sus creacion de botigues online damb WordPress+Wocommerce, que debanarà enes installacions deth CEI Val d’Aran, Plaça Naua, 1 de Casau.

Trobaratz tota era informacion sus era aufèrta formatiua, eth calendari e de coma inscriuer-se as corsi e capsules en http://www.ceivaldaran.org/ca/properes-capsulas-i-cursos/

Eth CEI Val d’Aran aufrirà enguan un totau de 10 corsi que comencen eth mes d’abriu e finalizaràn eth mes de noveme de 2018.