Naua carta multiviatge entre era Val d’Aran e Lleida

A compdar deth pròplèu dia 1 de junh se met en foncionament era carta multiviatge ALSA entre era Val d’Aran e Lleida.

Eth viatgèr que dispòse dera carta gaudirà d’un important estauviament de 50%, en es trajèctes realizadi.

bus

Era Direccion Generau de Transpòrts e Mobilitat dera Generalitat de Catalunya, laguens des politiques de reequilibri territoriau, e en eth cas d’Aran, a demana deth Conselh Generau d’Aran, met en marcha ua naua carta multiviatges en trajècte: Val d’Aran- Lleida.

En paraules dera conselhèra de Torisme, Comèrç e Consum, Anna Díaz “eth govèrn deth Conselh Generau d’Aran cercaue, coma prumèr objectiu, eth poder desencarir eth còst des estudiants aranesi que corsen es sòns estudis en Lleida.”

Eth prètz dera carta ei de 80,00€ e permeterà realizar eth trajècte entre eth cap-lòc de Ponent e era Val d’Aran per sonque 8,00€. Era validesa deth títol ei de 120 dies qu’era persona que l’a aquerit pendent eth poderà gaudir deth descompde atau coma es sòns acompanhants.

Aguesta carta s’ahig ara ja existenta entre era Val d’Aran e Barcelona que ja ei en foncionament jos es madeishi critèris e ath prètz de 165,00€. Eth prètz deth viatge tà Barcelona des dera Val d’Aran ei 33,00€ se s’aquerís un bilhet simple, e de 16,50€ entad aqueres persones qu’aquerisquen era tarjeta T10/120.

Eth títol de transpòrt T10/120 ei multipersonal e pòt èster utilizat pes membres d’ua madeisha familha o per un grop d’usatgèrs entà hèr es sòns desplaçaments de forma conjunta. Aguest títol de transpòrt utilize era tecnologia de validacion sense contacte, se pòt recargar a bòrd des pròpris veïculs e pòt èster aquerit en es estacions d’autobusi de Lleida, Barcelona Nòrd e en es burèus dera empresa Alsa en Vielha.

Er establiment dera carta preten melhorar era competitivitat deth transpòrt public, tot en tot supausar un important estauviament en es viatges. Aguestes mesures pretenen promòir er usatge deth transpòrt public en es comunicacions entre era Val d’Aran e es caps-lòcs catalans, en tot dotar as viatgèrs d’un hilat eficient a prètzi atractius que contribuïsque a esténer er usatge.

Comments are closed.