Naua amassada dera equipa de trabalh sus eth Plan de refugis deth projècte ENTREPYR II

Vielha, 19 de hereuèr de 2019.- Eth Conselh Generau d’Aran a acuelhut ua naua amassada de trabalh deth Plan de refugis deth projècte ENTREPYR II, que hè part deth Programa de Cooperacion Territoriau Europèa INTERREG VA (Espanha-França-Andòrra) POCTEFA 2014-2020.

Era jornada de trabalh se celebrèc eth darrèr dia 11 de hereuèr entà tractar sus tematiques referents ad aguest Plan de refugis transfronterier, en encastres coma era modernizacion des refugis, bones e males practiques deth trabalh des guides, diagnostic e qualitat des refugis e aubèrges, gestion mieiambientau, seguretat e emergéncies, promocion, comunicacion e comercializacion, recomanacions des des burèus de torisme, e era formacion des agents.

En concrèt en aguesta jornada se tractèc era creacion der observatòri des refugis des dera Universitat de Toulouse, damb informacion de sojorns, usatgèrs, servicis, e sus coma a d’èster eth sistèma d’enquèsta e procediment. Ath madeish temps tanben s’elabòre ua enquèsta/estúdii entath tèma deth tractament des aigües residuaus e des banhs shuts des refugis.

En aguest sentit, cau arrebrembar qu’a trauès deth projècte ENTREPYR II, damb ua subvencion de 97.500 €, eth Conselh Generau d’Aran installarà es dus refugis de montanha dera Val d’Aran dus banhs shuts e dues potabilizadores entath tractament d’aigües residuaus. A part d’aguestes melhores eth Conselh Generau tanben a previst destinar part d’aguesta subvencion ara melhora dera promocion e comercializacion des rotes de senderisme dera Val d’Aran atau coma era difusion dera madeisha via web.

Eth Conselh Generau d’Aran participe en aguest projècte europèu amassa damb era Federación Aragonesa de Montañismo, era Federació d’Entitats Excursionistes de Catalonha (FEEC) e eth Gobierno de Aragón per part espanhòla, amassa damb eth Parc National des Pyrénées, L’Université de Toulouse III e era Federation Française des Clubs Alpins et de Montagne pera part francesa, e era Federació Andorrana de Muntanyisme coma entitat associada.

POCTEFA ei un programa europèu de cooperación transfronterièra creat entà fomentar eth desvolopament sostenible, atau coma entà refortilhar era integracion economica e sociau deth territòri de Catalonha que limite damb França e Andòrra, a trauès deth finançament de projèctes dessenhadi e geridi per organismes publics e privadi des dus costats des Pirenèus. Eth Programa se finance a trauès deth Hons Europèu de Desvolopament Regionau (FEDER).

 

Comments are closed.