Des deth mes de junh de 2015 era Societat Estatau entara Gestion dera Innovacion e es Tecnologies Toristiques (SEGITTUR), depenenta deth Ministèri d’Indústria, Energia e Torisme, e adscrita ara Secretaria d’Estat de Torisme, a analisat, diagnosticat e identificat es linhes d’accion dera Val d’Aran coma destinacion toristica enes airaus de sostenibilitat, innovacion, naues tecnologies e accessibilitat.
Era conselhèra de Torisme e Desvolopament Economic d’Aran, Anna Díaz e eth director d’I+D+I dera Societat Estatau entara Gestion dera Innovacion e es Tecnologies Toristiques, SEGITTUR, Carlos Romero, an presentat en Conselh Generau d’Aran eth Balanç dera analisi dera Nòrma de Gestion de Destinacions Toristiques Intelligents (DTIs) ena Val d’Aran.
Era reconeishença de Destinacion Toristica Intelligenta avale era incorporacion ath modèl toristic dera Val d’Aran eth trabalh ena innovacion, tecnologia, sostenibilitat e accessibilitat, quate factors competitius que garantissen eth present e eth futur deth torisme ena Val d’Aran.
SEGITTUR inicièc eth trabalh DTI ena Val d’Aran en mes de junh, e a consistit en analisar e diagnosticar es linhes d’accion realizades en Aran coma destinacion enes quate variables que definissen a ua Destinacion Toristica Intelligenta, era fasa finau a consistit ena elaboracion d’un informe de recomanacions que s’integrarà coma programes especifics en nau Plan de Torisme Val d’Aran 2016-2020 e ei çò que s’a presentat en Conselh Generau ath sector toristic dera Val d’Aran.
Er anterior plan de torisme 2012-2015 dera Val d’Aran culmine damb era obtencion d’aguesta reconeishença que s’enquadre en programa de competitivitat deth plan e que s’an desvolopat a trauès d’eth diferentes linhes de trabalh qu’an artenhut qu’era Val d’Aran arrecebe diferentes certificacions e reconeishences, entre es que destaquen eth de destinacion sostenible Biosphere autrejat peth Globau Sustainable Tourism Council dera Fondacion Nacions Junhudes, finalista enes Destination Leadership autrejadi pera National Geographic Society e era ITB de Berlin, e aguest darrèr peth sòn trabalh coma Destinacion Toristica Intelligenta (projècte prebotjat peth Ministèri d’Indústria, Energia e Torisme, a trauès deth Plan Nacionau e Integrau de Torisme 2012-2015).
Era Val d’Aran a estat un des projèctes pilòt desvolopat per SEGITTUR e qu’a consistit en analisar e recomanar accions enes quate èishi que conformen ua DTI: innovacion, tecnologia, sostenibilitat e accessibilitat. Er informe recuelh tota era informacion de besonh sus es hònts de finançament que faciliten eth desvolopament des accions e qu’aufrissen tant eth Ministèri d’Indústria, Energia e Torisme, a trauès deth Plan Nacionau de Ciutats Intelligents, Emprendetur e eth FOMIT, coma era Union Europèa, mejançant es hons FEDER.
Des deth Govèrn d’Aran s’an realizat sessions informatives a empresaris e institucions araneses entà explicar eth significat des Destinacions Toristiques Intelligents. En paraules dera conselhèra de Torisme e Desvolopament Economic d’Aran, Anna Díaz: “Ua Smart Destination ei ua destinacion innovadora, que trabalhe entà assolidar era sua infrastructura tecnologica e que garantís eth desvolopament sostenible deth territòri. Facilite era interaccion e integracion deth visitant damb er entorn e incremente era qualitat dera sua experiéncia”. Díaz a hijut: “Era Val d’Aran, ei ua destinacion toristica competitiva qu’aufrís servicis de qualitat a quinsevolh perfil de viatgèr. Er informe que presentam ei fòrça interessant e mos serà fòrça util entà melhorar damb es recorsi qu’auem”.
“Damb era implantacion deth Sistèma de Torisme Responsable e era obtencion deth certificat Biosphere, era Val d’Aran auance cap a un nau modèl de desvolopament toristic basat enes principis dera sostenibilitat, era diuersitat culturau e era responsabilitat sociau, era quau causa contribuís ath hèt qu’era Val d’Aran sigue ua destinacion toristica basada en respècte dera sua cultura, eth miei ambient e era responsabilitat” a soslinhat era conselhèra de Torisme e Desvolopament Economic d’Aran, Anna Díaz.
Vielha, 17 de març de 2017
Conselh Generau d’Aran: Núria Sanjuan