Presentacion deth projècte TRANS-GARONA que junherà era Haute Garonne e era Val d’Aran en bicicleta

Vielha, 4 de juriòl de 2018.- Ager dimars 3 de juriòl se presentèc en Saint Gaudens (França) eth projècte transfrontalièr TRANS-GARONA, que junherà a trauès d’ua rota ciclista era Haute Garonne e era Val d’Aran.

Er acte de presentacion d’aguest projècte europèu compdèc damb era preséncia deth president deth Conseil départemental dera Haute Garonne Georges Méric e deth conselhèr de Territòri d’Aran José Antonio Boya, acompanhadi d’autes autoritats franceses e araneses, atau coma d’empresaris deth sector toristic des dus costats dera frontèra.

Neishut damb era volontat de desvolopar eth torisme verd, en tot refortilhar ath madeish temps er atractiu des zònes ruraus e de montanha ad ambdús costats dera frontèra entre França e Espanha, eth projècte TRANS-GARONA ei ua rota ciclista que junh Toulouse damb es hònts deth Garona ena Val d’Aran. Eth Conseil départemental dera Haute-Garonne (Deputacion Provinciau) e eth Conselh Generau d’Aran collabòren en bastiment des 21km deth tram sud deth TRANS-GARONA entre Fronsac e Vielha.

Eth bastiment d’aguest tram sud comence enguan 2018 e finalizarà a principis de 2021, en tot completar eth traçat deth TRANS-GARONA, que ja n’i a trams en foncionament. En costat francés s’an completat 107 km des de Marquefave enquia Fronsac. En aranés, i a un hilat de rotes senhalizades tant entà BTT coma per carretèra, que permeten passejades tranquilles ath costat der arriu en tot enlaçar pòbles o baishades tecniques per bòsqui. Eth tram nòrd deth traçat entre Portet-sud-Garonne e Marquefave, de 42km de longitud, serà bastit peth Conseil départemental dera Haute-Garonne entre 2020 e 2021.

Eth projècte TRANS-GARONA s’inscriu pleaments enes prioritats definides pera Val d’Aran e era Haute-Garonne en matèria de desvolopament toristic, ath temps qu’arrespon a multiples rèptes locaus en tèrmes de valorizacion der auviatge e des espacis naturaus e dera promocion dera mobilitat sostenible e deth miei ambient, a trauès d’ua major consciéncia dera riquesa economica deth territòri.

TRANS-GARONA ei cofinanciat en un 65% peth Hons Europèu de Desvolopament Regionau (FEDER). Aguesta ajuda europèa s’enquadre laguens eth Programa Operatiu de Cooperacion Territoriau Espanha-França-Andòrra 2014-2020 (POCTEFA), damb er objectiu de refortilhar era integracion economica e sociau dera zòna fronterèra Espanha-França-Andòrra. Era sollicitud deth finançament deth projècte siguec presentada amassa peth Conseil départemental dera Haute Garonne e eth Conselh Generau d’Aran en deseme de 2016, e siguec aprovada en noveme de 2017. Eth còst d’aguest tram sud ei de 3,58 milions d’èuros, que 65% n’ei finançat peth FEDER, ei a díder, 2,39 milions d’èuros d’ajuda europèa (includidi 1.580.000 èuros concedidi ath Conseil départemental dera Haute Garonne e 810.000 èuros concedidi ath Conselh Generau d’Aran).

Pendent er acte de presentacion deth projècte, eth conselhèr de Territòri d’Aran José Antonio Boya, metec en valor eth TRANS-GARONA coma ua iniciatiua fòrça interessanta que ven a somar-se a d’auti projèctes de cooperacion transfrontalièra compartidi entre eth Conselh Generau d’Aran e desparières institucions franceses, coma era linha d’autobús que junh era Val d’Aran e era Haute Garonne damb connexion enquia Toulouse, eth projècte Entrepyr II de refugis de montanha, eth deth Camin de Sant Jaume, e recentaments era signatura en Saint-Bertrand de Comminges, d’un acòrd marc entà meter es bases juridiques dera collaboracion transfrontalièra entre eth Conselh Generau d’Aran e era Communauté de Communes Pyrénées Haut Garonnaises, damb er objectiu de crear a finaus d’enguan 2018 eth “Grop Europèu de Trabalh Transfrontalièr Aran – Pirenèus HautGaronnaises”, qu’a de perméter desvolopar projèctes economics d’interès comun, enes àmbits deth Desvolopament sostenible; era Cultura, Lengua e Tradicions; er Estat deth Benéster; eth Progrès Economic e Empresariau; era Seguretat; eth Prumèr Sector; eth Torisme e eth Comèrç; e es Infrastructures.

En tot centrar-se en projècte TRANS-GARONA, José Antonio Boya hec mencion ara dificultat que compòrte eth bastiment des prumèrs 3Km dera rota ena Val d’Aran a causa dera orografia, çò que harà qu’eth rèste de trams enquia Pla de Beret se realize en fases posteriores. Boya ahigec qu’era volontat deth Govèrn d’Aran, ei qu’era rota ciclista pogue auer contunhitat mès ath delà dera Val d’Aran en en direccion entà Catalonha e Andòrra.

Comments are closed.