Presenten era Maleta Pedagogica des Halhes deth Pirenèu

Eth projècte s’ajuste as objectius de Desvolopament Sostenible establidi pera ONU

Vielha, 16 de hereuèr de 2019.- Era maleta pedagogica des Halhes deth Pirenèu consistís ena reproduccion en miniatura des, Haros, halhes e Brandons deth Pirenèu e de materiaus e activitats pedagogiques sus era tradicion fallaire, adreçadi a alumnes de primària e prumèr cicle de segondària des escòles de Catalonha, Andòrra, Aragon e Occitània, damb er objectiu de dar a conéisher era origina, era istòria e eth foncionament d’aguesta tradicion as estudiants des escòles des Pirenèus entà facilitar er escambi d’aguestes coneishences entre tota era comunitat fallaire. Eth projècte s’ajuste as objectius de Desvolopament Sostenible establidi pera ONU.

Era maleta pedagogica ei un projècte impulsat pera Cátedra Educacion e Auviatge Inmateriau des Pirenèus dera Universitat de Lhèida que s’a presentat en Conselh Generau d’Aran.

Eth materiau didactic s’estructure en sies apartats: Era husta deth huec; Tanti caps tanti troncs; Paraules ath torn deth huec; Territòri fallaire; Prometeo era ahlama deth solei; Balhs e cançons ath torn deth far.

Era Val de Aran ei un des territòris a on era tradicion fallaire ei presenta damb es Haros de Les e Arties que celèbren dues hèstes que diden fòrça deth sòn caractèr e es sues tradicions. Es Haros dera Val d’Aran en deseme de 2015 sigueren arreconeishudi peth comité intergovernamentau dera Unesco coma Auviatge Inmateriau dera Umanitat amassa damb eth rèste des hèstes deth huec deth Pirenèu. Aguesta catalogacion contemple es 63 hèstes deth huec que se celèbren pendent eth solstici d’estiu enes Pirenèus.

Era celebracion a un origen ancestrau, estretaments estacat as cicles agraris e solars. Se relacione damb es rites primitius de regeneracion dera vida naturau, de fecunditat e d’arregraïment as dius peth succès des cuelhutes e era arribada deth bon temps. Ena Val d’Aran aguestes hèstes temps en darrèr se celebrauen en toti es pòbles, mès sonque Les e Arties les an mantengudes.

Era Cátedra Educacion e Auviatge Inmateriau des Pirenèus dera Universitat de Lhèida a previst presentar e desvolopar eth projècte pes territòris pendent eth cors 2019-2020.

Comments are closed.