Vielha, 19 de gèr de 2018.- Es conselhèrs deth Plen deth Conselh Generau d’Aran an assistit ara presentacion deth precèpte sus era posita juridica deth dret a decidir arreconeishut ena Disposicion Addicionau Prumèra dera Lei 1/2015, de 5 de hereuèr, deth regim especiau d’Aran.
Eth precèpte a estat elaborat per Alfredo Galán, Catedratic de Dret Administratiu dera Universitat de Barcelona e per Eduard Roig, Catedratic de Dret Constitucionau dera Universitat de Barcelona, en responsa ara comanda hèta per part deth Conselh Generau d’Aran sus aguest ahèr.
En çò que tanh as conclusions des professors, Alfredo Galán, expliquèc qu’eth dret a decidir deth pòble aranés ja ei plasmat ena pròpria Lei de regim especiau d’Aran, en tot destacar era sua originalitat, pr’amor qu’ei eth prumèr còp qu’en un tèxte normatiu s’arreconeish damb aguesta terminologia eth dret a decidir. Es expèrts concludissen tanben qu’eth dret a decidir includit ena Lei d’Aran, ei tanben garantia, pr’amor qu’empedís que se modifique eth regim especiau se non i a intervencion prealabla des pròpries institucions araneses. De cara ath futur, signifique era possibilitat qu’a eth pòble d’Aran de prepausar era melhora deth sòn autogovèrn, tostemp damb eth limit clar deth respècte as procediments establidi entara reforma des nòrmes.
Galán a explicat tanben qu’eth dret a decidir arreconeishut ena Lei d’Aran, a eficacitat front ara comunitat autonòma qu’a arreconeishut aguest dret, qu’en cas dera Val d’Aran, ei eth Parlament de Catalonha
Pera sua part, eth sindic d’Aran, Carlos Barrera, expliquèc qu’eth precèpte a estat encargat peth Conselh Generau d’Aran entà esclarir qué signifique en tèrmes juridics eth dret a decidir deth pòble aranés. En tot ahíger qu’actuauments eth dret a decidir deth pòble aranés, ei enquadrat exclusivaments laguens er àmbit territoriau e administratiu deth Parlament de Catalonha.
Fin finau, Carlos Barrera, expliquèc que se les a encargat as madeishi Catedratics Alfredo Galán e Eduard Roig, un dusau precèpte sus eth dret a decidir deth pòble aranés, en marc d’ua possibla futura revision o reforma dera Constitucion Espanhòla.