Des deth Departament de Politica Lingüistica deth Conselh Generau d’Aran s’a volut facilitar un recors mès entà promòir er aranés a nivèu orau ena etapa infantila. Consistís en qu’ua relatora se desplace per totes es escòles dera Val d’Aran a condar condes en aranés. Son condes de Kamishibai, un sistèma japonés ben antic qu’imite un petit teatret en husta per a on eth condaire va passant es imatges en cartons ara ora que va relatant. Eth mainatge sonque ve era imatge e eth relator lieg eth tèxte qu’ei darrèr dera imatge.

En aguesta ocasion es condes son un prèst deth CIRDOC (Centre Interregionau de Desvolopament der Occitan) gràcies a un convèni damb eth Conselh Generau d’Aran.

Enquià mai de 2017 era relatora, Kristina Nart, enviada peth Conselh Generau anarà tàs escòles dera Val d’Aran entà condar un conde e ara seguida hèr ua activitat relacionada damb eth conde que dure pròp d’ua ora. Aguesti relats son adequadi tà mainatges de 2 a 5 ans e se realize en grops de 20 mainatges.

Vielha, 24 de març de 2017

Conselh Generau d’Aran: Núria Sanjuan