Eth patinador aranés, Tòn Cónsul, participèc era dimenjada passada ena pròva Internacionau celebrada en Canillo- Andòrra. Enguan, aguesta pròva de caractèr internacionau, ei laguens deth calendari de pròves arreconeishudes pera Federacion Internacionau (OPEN ISU), e per açò, participèren es melhors patinadors espanhòus que hèn concurréncia enes categories internacionaus. I auec tanben destacada representacion internacionau.

Dempús des dus dies de competicion, eth pòdi siguec format peth Italian, Adrien Bannister, qu’artenhec er aur, Aleix Gabara, deth FCB era dusau posicion e era tresau, Tòn Cónsul, tanben deth FCB.

Dempús dera prumèra jornada ena qué se realizaue eth programa cuert, eth patinador aranés ère plaçat ena prumèra posicion. Eth dusau dia dera competicion, dempús deth programa liure qu’estree aguesta sason, eth patinador perdec dues posicions en classament finau. Eth nau programa liure de Cónsul recree era figura de Sherlock Holmes, acompanhat pera banda sonora dera darrèra version estreada en cinèma. Aguest programa conten cinc triples de fòrça dificultat, en tot destacar tanben eth nivèu des sues piruetes.

Tòn mos comentèc que contunhe entrenant dur e eth sòn pròplèu objectiu ei eth campionat d’Espanha que se celebrarà en deseme ena ciutat de Granada.