Retorn de 5 talhes de husta as parròquies dera Val d’Aran

Vielha, 27 de junhsèga de 2017.- Eth passat 25 de junhsèga dempús de diferenti trabalhs de restauracion, tornèren ara Val d’Aran, as sues respectiues parròquies de procedéncia un grop de 5 talhes de husta, integrat per:

  • Mair de Diu d’Arròs.
  • Jaume d’Arties.
  • Esteve d’Arties.
  • Mair de Diu de Tredòs.
  • Esteve d’Arties.

 Cap d'Aran

Totes eres, amassa damb era imatge titulara deth santuari de Sant Joan d’Arròs e Vila que ja retornèc eth passat 5 de mai, estilisticaments apartien ath nomenat “talhèr de Comenge”, un grop artistic d’escultura gotica iniciau que, a shivau des sègles XIII e XIV, desvolopèc ua grana activitat enes territòris der ancian avescat de Comenge (Val d’Aran e part des actuaus departaments francesi deth Haute-Garonne e Hautes Pyrénées).

Maugrat qu’era identificacion deth talhèr auec lòc ja hè bèri decènnis a trauès de bères ues des òbres mès considerables, conservades ath Musèu Nacionau d’Art de Catalonha (MNAC), en Musèu Frederic Marès de Barcelona o ena madeisha Val d’Aran, non a estat enquia hè pòc temps que, a trauès d’ua recèrca istorica e artistica mès exaustiva e aprigondida, s’a pogut agarrar era grana estenduda e difusion qu’artenhec aguest talhèr o grop artistic.

A dia d’aué, ena Val d’Aran s’an pogut identificar es trèti artistics deth talhèr en mès de 10 òbres, ath delà de fòrça autes aué malastrosaments desapareishudes o escampilhades per diferenti musèus de Catalonha, encara que plan seguraments de procedéncia aranesa. Enes vals franceses der ancian avescat eth nombre d’òbres identificades ei encara mès naut.

En 2016, eth Conselh Generau d’Aran, damb ua subvencion dera Generalitat de Catalonha, manèc ara enterpresa especializada TdArt diferenti trabalhs encaminadi a obtier informacion complementària sus bèra d’aguestes òbres, referent as hustes utilizades, determinar es capes de policromia e es pigments utilizadi enes policromies originaus quan s’an conservat, atau coma era realizacion de radiografies.

Tanben se’n a efectuat era desinfeccion, neteja e quan s’a considerat de besonh, era fixacion e consolidacion dera capa pictorica.

Amassa damb aguestes òbres deth talhèr de Comenge, tanben retornarà a Escunhau, era imatge titulara, tanben gotica, de sant Père entronitzat, de mejans deth s.XIV. En aguest cas er objectiu principau dera intervencion a estat era fixacion, damb caractèr d’urgéncia, dera capa pictorica que presentaue un estat fòrça dolent, damb nombrosi despreniments e suslhèuaments generalisadi dera policromia. En cors des trabalhs, en bères ues parts dera òbra s’a localizat, ua policromia subjacent, de major qualitat, possiblaments era originària, que s’a considerat convenenta deishar ara vista.

Toti es trabalhs s’an amiat a tèrme en Centre de Restauracion de Bens Mòbles de Catalonha, en Valldoreix (Barcelona), dejós dera supervision tecnica des sòns responsables.

StEsteueArties St.JaumeArties MairDiu eStEsteueCapdAran Escunhau Arròs2 Arròs1 Arròs

 

Comments are closed.