Aguest maitin a agut lòc en Conselh Generau d’Aran era reünion tecnica organizada entà avalorar es atacs qu’er os Goiat a protagonizat pendent es darrères setmanes ena Val d’Aran. Pendent eth darrèr mes, s’a constatat mejançant eth localitzador GPS qu’a installat er os Goiat, era sua preséncia enes lòcs a on s’an produsit es atacs. Qu’a dia d’aué representen ua quinzea d’oelhes, dues cavales adultes e un potro.

Oriol Alamy Depana – Estiu 2016

Pendent era reünion, qu’ei part d’un procès d’avaloracion deth comportament aversiu der animau, s’a avalorat era frequéncia e circonstàncies des atacs, en tot èster çò mès destacable era mòrt des dues cavales adultes e es atacs realizadi a ramats d’oelhes maugrat era preséncia de mesures protectritzes. (Corraus, e pastorets electrics)

S’a acordat realizar un seguiment mès intensiu der animau (pr’amor qu’es donades deth GPS arriben damb ores de diferéncia) entà poder constatar damb eth menor temps possible se s’an produsit naui atacs e d’aguesta forma poder aplicar mesures correctritzes cossent damb eth protocòu establit en cas d’elements conflictius

Tanben s’a acordat ua recopilacion dera informacion disponibla entà analisar es circonstàncies de cadun des atacs en tot includir aqueri realizadi en França, entà avalorar damb major precision era conducta der individu.

En aguesta darrèra dimenjada, s’an visualizat enes montanhes d’Aran 6 exemplars d’ossi, aguesta circonstància poderie èster motivada pera epòca de gelosia qu’es femelhes separen es cadèths neishudi hè 2 ans qu’encara anauen damb eres.