Telefónica e eth Conselh Generau d’Aran signen un convèni entà melhorar es infrastructures de Telecomunicacions

Era Companhia e eth Conselh Generau an signat aué un convèni de collaboracion entà melhorar es infrastructures de comunicacion ena Val d’Aran.

Telefónica facilitarà era cobertura 4G a tota era Val d’Aran.

Tanben se melhoraràn es infrastructures deth hilat entre Vielha e Les.

Melhores de connectivitat enes refugis de montanha damb era fin de que ua bona connexion garantisque era seguretat des visitants.

telefonica_conveni

Eth sindic d’Aran, Carlos Barrera, eth conselhèr d’Administracion Publica, Finances e Coneishement d’Aran, Luís Carlos Medina, eth conselhèr de Territòri d’Aran, Eduardo Valdecantos, eth director d’Empreses e Administracions publiques de Catalonha, Enrique Santiago, e eth conselhèr de Telefónica Catalonha, Ramon Salabert, an signat aué eth convèni de collaboracion entre eth Conselh Generau d’Aran e Telefónica entà melhorar es infrastructures de telecomunicacions ena zòna.

Eth convèni a coma objectiu profitar es sinergies d’ambdues parts entà promòir eth desvolopament sostenible deth hilat empresariau, atau coma favorir era emprenedoria e era economia locau, en tot cercar er equilibri entre es diferentes zònes dera Val d’Aran.

Er encastre deth convèni contemple coma aspèctes principaus era melhora des infrastructures de telecomunicacions, damb era dotacion de cobertura 4G en Baqueira, Beret e Salardú, e era melhora deth hilat entre Vielha e Les e era collaboracion damb eth Conselh damb er objectiu de melhorar era connexion des refugis de montanha atau coma des sòns sistèmes de comunicacions entà previer era incidéncia que sigue.

En aguesta linha d’accions, eth convèni daurís es pòrtes ara collaboracion entre ambdues parts ena elaboracion e implementacion d’un plan tecnologic entà promòir eth desvolopament sostenible deth hilat empresariau dera Val d’Aran, en tot profitar era potencialitat de projèctes e sectors estrategics compatibles damb eth desvolopament sostenible dera societat e en tot preservar es recorsi ambientaus e culturaus dera zòna.

Tot açò, se preten arténher a trauès des Tecnologies dera Informacion e era Comunicacion (TIC) e d’auti sectors que poguen sorgir e desvolopar-se en futur, en tot impulsar era competitivitat locau e en tot estimular era cooperacion publica-privada mejançant eth foment dera innovacion e es activitats R+D+i.

salabert_sindic

En paraules deth sindic d’Aran, Carlos Barrera, “era volentat deth govèrn deth Conselh Generau d’Aran ei qu’era signatura d’aguest convèni sigue eth començament d’ua collaboracion damb era companhia Telefónica”.

Barrera a hijut que “se crearà ua comission de seguiment ara fin de contunhar mielhorant es Telecomunicacions deth territòri. A compdar deth pròplèu mes de deseme, totes es estacions dera Val d’Aran compdaràn damb era cobertura 4G ”.

Per çò qu’ei de Telefónica en Catalonha

Telefónica ratifique eth sòn compromís peth benestar economic e sociau de Catalonha. Mòstra d’açò son es 582 punts de venta, es 243,1 milions d’èuros facturadi a un totau de 290 provedidors, es cinc centres d’atencion telefonica as sòns clients en Catalonha, e era contribucion ath trabalh a trauès des 4.210 persones qu’a era plantilha. Ath delà, Telefónica sosten ath sector des TIC, era cultura, era emprenedoria e er Espòrt a trauès de diferenti patrocinis.

Eth futur de Telefónica ei estacat ath benestar economic e sociau des Comunitats a on ei presenta. Aguest ei eth nòste objectiu en Catalonha: melhorar era vida des catalans, facilitar eth desvolopament des negòcis e contribuïr ath progrès d’aguesta comunitat autonòma. E, per descompdat, eth nòste objectiu coma Telco Digitau consistís en apropar eth melhor dera tecnologia as persones. Toti hèm part d’aguest rèpte apassionant damb çò que mos cau poder transformar era nòsta realitat economica e sociau en ua realitat melhora entà toti.

Comments are closed.