Vielha, 7 de hereuèr de 2019.- Er esquiaire aranés Álex Puente classificat entath Campionat deth Mon d’Esquí Aupin 2019 en Are (Suècia) serà esponsorizat per Foment Torisme Val d’Aran pendent un an en tot coïncidir damb era sua classificacion entad aguest campionat.

Álex Puente, que comencèc era sason actuau coma eth 108 en classament mondiau de slalom, compdarà damb eth supòrt de Torisme Val d’Aran en Campionat deth Mon d’Esquí que se dispute enquiath pròplèu 17 de hereuèr en Suècia. Er esportista aranés deth CAEI-FCEH, de 24 ans, ei especialista en slalom e gigant. A artenhut aguesta sason entrar eth 11au en Copa d’Euròpa, concrètaments en SL de Val Cenis. Tanben s’a imposat en dues pròves FIS, en deseme en GS de Davos (Soïssa) e en gèr en SL de Folgaria (Itàlia). A estat eth darrèr des esquiaires aranesi en debutar en uns Jòcs Olimpics, en Sochi’14 e aguesti seràn es sòns prumèrs Mondiaus. Era sason 2017-2018 pugèc ath pòdium 4 còps en carrères FIS, enes modalitats de SL e GS, ua victòria enes Campionats Júnior Nacionaus de Gstaad Saanenland (Soïssa) e un prumèr e 3au lòc enes Campionats Nacionaus de Sierra Nevada, en slalom e supèr gigant, respectivaments. En tot manifestar era sua polivalencia.

Era conselhèra de Torisme d’Aran, Anna Díaz, a explicat qu’era participacion d’un esportista aranés en ua pròva esportiua de prumèr nivèu coma ei eth campionat deth mon ei un moment unic entà dar a conéisher era Val d’Aran. En aguest sens, Díaz a comentat qu’eth Campionat deth Mon de Are en Suècia en que participe Álex Puente “ei ua oportunitat que non podíem deishar passar entà dar a conéisher era nòsta destinacion toristica de nauta montanha”. Anna Díaz, a arrebrembat que des deth Conselh Generau d’Aran tostemp se sage de collaborar damb es esportistes aranesi que participen en competicions de naut nivèu coma ei eth cas de Aymar Navarro en Freeride e Ruben Caseny en ciclisme entre d’auti, o en casi qu’era gèsta der esportista atau ac merite coma siguec eth cas de Óscar Cadiach qu’en 2017 se convertic en alpinista de major edat en integrar era lista de persones qu’an artenhut es 14 montanhes mès nautes dera planeta damb era collaboracion de Torisme Val d’Aran.

Er aranés Álex Puente hè part dera equipa dera RFEDI (Reau Federacion Espanhòla d’Espòrts d’Iuèrn) en Campionat deth Mon d’Esquí Aupin 2019 ath costat de Juan del Campo, format coma esquiaire dera man deth club CEVA ena Val d’Aran, Quim Salarich, Núria Pau e Adur Etxezarreta.

Eth Campionat deth Mon d’Esquí Aupin se celèbre en Are (Suècia) des deth 4 enquiath 17 de hereuèr.