Torisme Val d’Aran promocione era sason d’iuèrn aranés en Winter Show 2018 d’Estocòlme

Vielha, 8 de noveme de 2018.- Torisme Val d’Aran e Baqueira Beret participen aguesta dimenjada, es dies 10 e 11 de noveme, ena hèira Winter Show d’Estocòlme en Suècia, a on presentaràn es novetats dera sason 2018/19 dera estacion d’esquí aranesa amassa damb tota era aufèrta complementària e de servicis dera Val d’Aran.

Era hèira Winter Show d’Estocòlme ei un eveniment especializat en torisme de nhèu adreçada a tot tipe de public qu’er an passat arrecebec era visita de 19.000 persones.

Era conselhèra de Torisme d’Aran, Anna Díaz, a explicat qu’entara Val d’Aran ei fòrça important èster presents en Estocòlme, donques eth torista suedés ei un visitant expèrt qu’avalore fòrça era aufèrta toristica de nhèu que pòt trobar dehòra des païsi nordics.

En aguest sens, Anna Díaz, a arrebrembat qu’eth touroperador suedés Quality Travel, qu’opère per dusau an en aeropòrt de Lhèida-Alguaire, aufrís entad aguesta sason d’iuèrn paquets toristics en Aran e qu’era prevision ei qu’opère pendent ueit setmanes entre eth 3 de hereuèr e eth 24 de març, damb dus vòls es dimenges. Díaz a soslinhat qu’es toristes qu’arribaràn ena Val d’Aran provieràn de sèt ciutats suedeses: Estocòlme, Malmö, Kalmar, Göteborg, Linköping, Vaxjo e Jönköping.

Cau arrebrembar tanben que Torisme Val d’Aran e Baqueira Beret realizen enquiath 23 de noveme era gira de presentacion dera sason d’iuèrn per 18 ciutats espanhòles que contunharà eth pròplèu 13 de noveme en l’otèl Bellver de Palma de Malhòrca e en Toulouse ena Maison Val d’Aran-Baqueira Beret, 39 Rue Pharaon de Toulouse. Era pròplèu dimenjada, es dies 16 e 17 de noveme era presentacion debanarà en Platea Madrid un des centres d’òci e gastronomic mès grani d’Euròpa.

Fin finau soslinhar que Torisme Val d’Aran a participat recentaments ena hèira Expotural de Madrid e en salon de torisme “Vivons 100% Sport” de Bordèus, un salon adreçat ath public professionau e de caractèr esportiu.

 

Comments are closed.