Visita dera delegacion deth Valle del Jerte ena Val d’Aran

Vielha, 24 de noveme de 2017.- Ua delegacion formada per mès de trenta persones dera Mancomunitat deth Valle del Jerte en Extremadura, a visitat aguesta setmana era Val d’Aran entà conéisher de prumèra man eth sòn modèl toristic.

Era representacion dera Agropacion de Cooperativa deth Valle del Jerte e d’autes entitats dera region extremenha s’an interessat peth desvolopament deth programa de Smart City destination.

Es responsables des municipis, denominacions d’origina e entitats toristiques e de desvolopament deth Jerte vòlen fixar-se ena experiéncia de Torisme Val d’Aran entà elaborar eth sòn Plan Estrategic de Torisme e conéisher es punts a on pòt auer coïncidéncies, entà impulsar eth desvolopament toristic deth sòn territòri.

Era conselhèra de Torisme e Desvolopament Economic d’Aran, Anna Díaz, acuelhec en Conselh Generau d’Aran ara delegacion deth Valle del Jerte, a on les expliquèc era experiéncia e eth camin recorrut per era e era sua equipa sus eth reconeishement de Destinacion Toristica Intelligenta qu’avale era incorporacion ath modèl toristic dera Val d’Aran en trabalh en innovacion, tecnologia, sostenibilitat e accessibilitat, quate factors competitius que garantissen eth present e eth futur deth torisme ena Val d’Aran.

Anna Díaz didec qu’era Val d’Aran auance entà un nau modèl de desvolopament toristic basat enes principis dera sostenibilitat, era diuersitat culturau e era responsabilitat sociau, çò que contribuís a que sigue ua destinacion toristica basada en respècte ara sua cultura, eth miei ambient e era responsabilitat.

Felipe Heras, president deth Grop d’Accion Locau deth Valle del Jerte, Soprodevaje (Societat entara Promocion e Desvolopament deth Valle del Jerte) e tinent de baile de Cabezuela del Valle, expliquèc qu’eth viatge a coma objècte poder compartir experiéncies e aplicar-les dempús en Valle del Jerte, coma per exemple eth modèl de consòrci public-privat existent ena Val d’Aran a trauès de Foment Torisme Val d’Aran.

Ara madeish eth Valle del Jerte ei ena fasa de pre-diagnostic en procès entà convertir-se en destinacion intelligenta- SmartCity destination.

Era sua delegacion tanben visitèc Jaca entà conéisher eth programa de ciutat destinacion intelligenta, que s’amie a tèrme en aguesta localitat.

 

 

 

Comments are closed.