• Pendent aguesta setmana, alumnes dera Escòla Alejandro Casona de Les, dera Escòla Sant Ròc de Bossòst, dera Escòla Loseron d’Arties e dera Escòla Garona de Vielha an interpretat diuèrses òbres teatraus arrevirades ar aranés.
• Eth Conselh entreguèc un diplòma as participants dempús des representacions.
Un an mès, eth Conselh Generau d’Aran a trauèrs deth Departament de Cultura e Lengua a organizat eth XIau Festivau de Teatre ena Escòla.
Pendent aguesta setmana, alumnes dera Escòla Alejandro Casona de Les, dera Escòla Sant Ròc de Bossòst, dera Escòla Loseron d’Arties e dera Escòla Garona de Vielha an interpretat diuèrses òbres teatraus arrevirades ar aranés.
Es òbres representades podien èster originaus e inedites, adaptacions o non d’òbres existentes, e en aranés (occitan d’Aran) damb eth tèma e eth genre dramatic ei liure. Era durada des òbres virèren ath torn des 30 minutes.
Era Escòla Garona de Vielha representèc era òbra “Coma passe eth temps” a cargue des alumnes de 2au. de Primària damb dialògs des madeishi alumnes e ampliada pes sòns mèstres.
Es alumnes dera Escòla de Gessa dera ZER representèren era òbra: “Era escòla de Mossur Ronron”, era istòria d’un mèstre e uns alumnes ben particulars.
Es alumnes dera Escòla Sant Ròc de Bossòst premaniren era òbra “Eth Gran Circ dera Fantasia”, ua version pròpria a compdar de fragments d’òbres de teatre.
E era Escòla de Les presentèc era òbra “Endreçam es nòstes emocions” escrita pes alumnes de cicle iniciau.
Era representacion des òbres se realizèc ena sala d’actes dera Escòla Garona de Vielha e ena Sala d’actes der Ajuntament de Les. Eth Conselh Generau d’Aran metec autocars a disposicion des escòles tath desplaçament de toti es sòns escolans.
Eth Conselh Generau d’Aran a participat enes despenes que se podien originar ara ora dera representacion des òbres damb un totau de 240€ per escòla o grop d’escòles participantes. Tanben entreguèc un diplòma as participants despús dera representacion.
S’a convidat ara direccion de cada escòla participanta entà assistir tara Serada d’entrèga des prèmis enes dies propèrs ara Hèsta d’Aran, laguens des actes corresponents ara sua celebracion.
Vielha, 20 d’abriu de 2018
Conselh Generau d’Aran: Núria Sanjuan