-
Era Generalitat de Catalunya, a trauès deth sòn Departament d’Agricultura, amie a tèrme aguest procès de vacunacion en Aran d’ençà d’aguesta setmana.
-
Eth Conselh Generau d’Aran collabòre n’aguesta actuacion en tot balhar supòrt tecnic a trauès deth Departament de Miei Ambient
-
Damb aguesta mesura s’ establís ua zòna de restriccion addicionau entà controlar era difusion dera malautia.
Diuendres passat, 7 de noveme, comencèc ena Val d’Aran era campanha de vacunacion contra era Dermatòsi Nodulara Contagiosa (DNC), damb un totau de cinc explotacions vacunades. Ath long des dies que vien se prevé qu’era vacunacion arribe a tot eth cens bovin dera Val d’Aran, qu’ei de lèu un milèr de caps de bestiar.
Eth Departament d’Agricultura, Ramaderia, Pesca e Alimentacion dera Generalitat de Catalunya a establit ua naua zòna de restriccion addicionau entà controlar era difusion d’aguesta malautia virau, qu’afècte exclusivament ath bestiar bovin.
Era ampliacion d’aguesta zòna, qu’afècte ara Val d’Aran, a coma objectiu arturar er espandiment deth virus e protegir eth conjunt deth sector ramadèr catalan, enquia corbir un totau de 23 comarques e un cens d’uns 370.000 caps de bestiar. 
Naua zòna de restriccion addicionau e inici immediat dera vacunacion
Aguest nau espaci de restriccion addicionau, que s’a integrat ara zòna ja existenta fixada a conseqüéncia des prumèri centres d’infeccion en sector der Alt Empordà e deth Gironès, includís era totalitat des comarques dera Val d’Aran, Alta Ribagorça, Pallars Sobirà, Pallars Jussà, Noguera,Alt Urgell, Solsonès, Pla d’Urgell, Segarra, Bages, Moianès, Anoia, Vallès Occidental, Barcelonès, Baix Llobregat, Alt Penedès e Garraf, e parciauments d’autes, coma Cerdanya, Berguedà, Osona, Vallès Oriental, Maresme e Segrià. 
Damb aguesta ampliacion, Catalunya aurà dues zònes de vacunacion:
- Zòna I: qu’inclodís es airaus a on ja s’auie declarat era malautia (Alt Empordà e Gironès).
- Zòna II o Zòna de Restriccion Addicionau (ZRA): a on a començat ara era vacunacion.
Vielha, 12 de noveme de 2025