• Aguesti prèmis as Trebalhs de recèrca, creadi en 2021, an coma objectiu reconéisher era dedicacion der estudiantat qu’utilize er aranés en encastre academic e scientific.

Eth Conselh Generau d’Aran impulse er usatge dera lengua pròpia ena educacion a trauès des Prèmis as Trebalhs de Recèrca en aranés destinadi as alumnes de 2n de bachelierat der Institut d’Aran.

Aguesti prèmis, creadi en 2021, an coma objectiu reconéisher era dedicacion der estudiantat qu’utilize er aranés en encastre academic e scientific.

Entara edicion corresponenta ath cors 2025-2026 s’an presentat un totau de ueit trebalhs de recèrca en aranés. Es alumnes an d’auer obtengut ua qualificacion parièra o superiora a 8 entà poder optar ath prèmi. Des deth Departament de Politica Lingüística, deth Conselh s’avaloren aguesti trebalhs des des punt de vista lingüistic, ei a díder, se ten en compde era gramatica, ortografía, lexic e sintaxi.

Eth jurat, format per dues tecniques deth Departament de Cultura e Lengua deth Conselh Generau, avalore tanben era exposicion orau realizada per cada participant.

Es prèmis an ua dotacion economica de 300 € e 200 €, segontes era qualificacion obtenguda.

Es títols des trebalhs d’enguan son es que seguissen e les podetz consultar ena web der aranés a compdar deth mes de junh en: https://aranes.conselharan.org/

• Silenci en cervèth, quan cada segon compde. Un estudi sus er ictus.
• Ua vida sense tu. En tot apréner a caminar de nau.
• Es hèstes deth huec.
• Eth prètz dera polarizacion: ua Espanha fracturada?.
• Dera bòrda enquiath cèu.
• Trincant cadies.
• Eres tanben corren.
• Dessenh e bastiment d’un larèr intelligent.

Eth Conselh Generau vò tornar a remercar “era importància de promòir er emplec der aranés entre era joenessa e de consolidar-ne era preséncia en encastres academics e de recèrca, contribuïnt atau ath prestigi e ara normalizacion dera lengua pròpia dera Val d’Aran”.

Vielha, 24 de mai de 2026