• Eth Conselh Generau d’Aran e eth Patronat de Turisme de Cambrils impulsen aguesta iniciativa, que promò eth producte locau e era cooperacion entre territòris.

• Mar i Muntanya refortís es ligams dera union culinària e toristica aranesa e mediterranèa.

Ager se hec en Cambrils era inauguracion oficiau dera prumèra edicion deth hestau Mar i Muntanya, ua iniciativa que nèish entà connectar dus territòris emblematics de Catalonha —era Val d’Aran e Cambrils— a trauès dera codina de producte e de tradicion.

Eth hestau, promoigut peth Departament de Torisme deth Conselh Generau d’Aran e eth Patronat de Turisme de Cambrils, ei plantejat en dues etapes. Era prumèra se desvolòpe deth 15 ath 30 d’octobre en Cambrils, a on era montanha visite era còsta; e era dusau, der 1 ath 15 de deseme, quan Cambrils ven tara Val d’Aran damb es sabors dera mar.

Damb format de jornades gastronomiques, 6 codinèrs aranesi e 6 codinèrs de Cambrils collabòren en un exercici creatiu de codina “a quate mans”, entà presentar un plat estela deth restaurant convidat e un plat inedit de mar e montanha, elaborat amassa.

Entath conselhèr de Torisme, Josep Canut: “en èster enguan Catalonha era Region Mondiau dera Gastronomia, ei un bon moment entà fusionar era codina aranesa damb era mediterranèa ath temps qu’amassam es tradicions culinàries des dus territòris”.

Aguest hestau celèbre e met en valor eth concèpte de “mar e montanha”, tan present ena identitat gastronomica catalana, a on pèish e cauquilhatge se conjuguen damb carn e productes dera tèrra entà crear sabors que remeten ara casa, ara tradicion e ara autenticitat deth producte locau.

Dus territòris, dotze codinèrs, ua passion comuna

Es propòstes creades pes dotze codinèrs son chucoses: un moth de vedèra de Les damb gamba blanca de Cambrils (Macarilla – Era Coquèla), un calamar damb pès de pòrc (Denver – Casa Turnay), era lobina damb coja, safran, comquat e mandonguilhes de sèpia e bolh (Rincón de Diego – El Portalet), un ceviche “peró-thai” de cèrvi e gamba (Hiu – Es Arraïtzes), e tradicionaus, com eth conilh farcit de cargòlhs damb lom de baudròia e chuc deth sòn rostit (Cal Tendre – Casa Irene) o eth canelon de coa de taure damb langostines (L’Original – Casa Rufus).