Aran Accion 2020-2030

Procès de debat e recuelhuda de proposicions d’accion entà encarar eth futur dera Val d’Aran

As esperit emprenedor e voleries repensar eth tòn futur?
As proposicions concrètes entà impulsar era economia aranesa quan pogam tornar-mos a socializar?
Penses que passada era situacion qu’ara viuem calerie hèr un cambi en positiu e repensar eth modèl territoriau dera Val d’Aran?
S’as responut òc a quinsevolh d’aguestes qüestions, te convidam a participar ena iniciativa ACCION ARAN 20/30.

Presentacion

Era Val d’Aran a ath deuant un ahèr important. Degut ara actuau situacion de crisi sanitària, eth nòste modèl economic s’a vist afectat grèument. E de forma especiau, eth nòste futur immediat.
Per aguest motiu, des deth Conselh Generau volem iniciar un procès de debat encarat ara accion immediata, recuelhent e consensuant proposicions, damb toti es que vos i volgatz ahíger, que pogue incidir ena regeneracion dera aucupacion e dera activitat economica. Era situacion ei encara ben incèrta, totun pensam que ja cau començar a trabalhar entà compdar damb un plan que mos permete activar-mos tan rapidament com sigue possible.
Aqueth plan a d’èster, ath delà, eth punt de partida d’un procès a mès long tèrme, entà qu’es accions d’aué agen incidéncia ena generacion d’un modèl territoriau entath deman, mès fòrt, sostenible e resilient.

Qué ei Accion Aran 2020-2030?

Accion Aran 20/30 ei un procès de debat entà consensuar entre toti possibles accions e linhes de trabalh que mos permeten afrontar, de manèra immediata, es besonhs e urgéncies deth moment, especificament en encastre economic e laborau.
Volem remassar informacion sus es interèssi de totes es persones araneses, especiaument d’aqueres que pensetz en redirigir o reorientar era vòsta activitat laborau entà iniciar naues activitats.
Un viatge ajam aguesta informacion e sapiam tà on vos agradarie dirigir es vòste energies, organizaram grops de trabalh entà debàter conjuntament de quina forma podem construïr un front comun en qué eth Conselh Generau e d’autes administracions publiques poguen somar-se-i e impulsar-lo amassa.
En cas deth sector toristic, qu’aglutine era major part de empreses e activitat economica dera Val d’Aran, se va a daurir un procès especific e en parallèl entà trabalhar de forma urgenta es sòns besonhs mès immediats. Aguest procès se va a coordinar damb ACCION ARAN 2020, mès va a auer eth sòn pròpi espaci e ritme de trabalh. En brèu, es empreses deth sector vatz a recéber informacionn sus aguest procès. Es dus procèssi non son excludents. Vos podetz incorporar a toti dus sense cap de problèma.
En globau, toti aguesti debats, an d’èster eth punt de partida d’un procès de mès long recorrut que mos permete generar un plan d’accion entà desvolopar un modèl territoriau de futur entara Val d’Aran.

Com i pòs participar?

Entà començar, te proposam de respóner eth següent qüestionari: https://forms.gle/yJwAuhQW4xNLqxz36
Aquerò mos permeterà saber quini son es tòns interèssi e de quina forma t’agradarie participar-i.
Quan auram remassat totes es responses (data limit 5 de mai), organizaram diferenti grops de trabalh entà dessenhar es accions concrètes a possar e trobar era manèra mès agila e efectiva de portar-les tà deuant.
Vos rebrembam que s’ètz empresa toristica e aquerò que vos preocupe son es besonhs mès immediats a resòlver enes mesi que vien per part deth sector, lèu receberatz informacion su com participar especificament en aguesti debats.
S’auetz quinsevolh aute dubte, mos podetz escríuer a: r.barella@aran.org.