-
Les, compde des d’aué, damb un nau espaci expositiu ena plaça deth Haro, entà explicar es Hèstes deth Huec.
-
Aguest equipament ei integrat laguens deth Hilat de Musèus deth Conselh Generau d’Aran., gràcies ath convèni signat entre eth govern aranés e er Ajuntament de Les que tanben contemple eth Castèth Pijaoèrt.
Aguest dissabte, s’inauguraue ERA CASA DETH HARO “MUSÈU DES HÈSTES DETH HUEC” eth prumèr espaci museuístic en terçon de Quate lòcs.
Er acte siguèc presidit pera sindica d’Aran, Maria Vergés, era conselhèra de Cultura dera Generalitat de Catalunya, Sònia Hernández e er alcalde de Les, Andreu Cortés.
En 2017 comencèren es prumèrs passi entà convertir era antica bibliotèca de Les e Archiu Calzado en centre expositiu. Era iniciatiua neishec d’un acòrd entre era Generalitat de Catalonha, er Ajuntament de Les e eth Conselh Generau d’Aran, que n’assumís era gestion laguens deth Hilat de Musèus dera Val d’Aran.
Un còp aprovada era cession der usatge dera bastissa ath Conselh Generau, comencèc era reabilitacion, òbra acabada en 2021. Eth projècte museografic se definic en 2023 e s’executèc ath long de 2024 e 2025.
Aguest equipament ei integrat laguens deth Hilat de Musèus deth Conselh Generau d’Aran. gràcies ath conveni signat entre era institucion aranesa e er Ajuntament de Les a on se contemple tanben eth Castèth Pijaoèrt.
Er espaci expositiu consistís en ua sala de 96 m2, dividida en tres espacis entà explicar eth fenomèn des hèstes deth huec:
- Pirenèus, ua tèrra de huec;
- Aran, ua istòria de huec;
- Les, ua hèsta de huec.
A trauès d’aguesti tres espacis se hè a conéisher des dera origina dera hèsta pagana, se recor eth territòri deth Pirenèu; seguís ena Val d’Aran, damb es testimònis que demòstren qu’entara net de Sant Joan se hège era hèsta en cada pòble; e,tà acabar, s’acabe en Les, a on era hèsta pren ua dimension qu’includís ues autes manifestacions dera cultura populara: dances, musica e vestits.
Vielha, 27 d’octobre de 2025