• Eth Conselh Generau d’Aran celebraue ager un acte commemoratiu en motiu des 40 ans dera inauguracion der actuau Espitau Val d’Aran, un equipament de referéncia entà tota era ciutadania aranesa e que tanben balhe servici ara Ribagòrça e eth Pallars.

• Er acte servic tanben entà presentar eth projècte de remodelacion der Espitau Val d’Aran, qu’ei previst que se comence a bastir en 2026, e que serà finançat pera Generalitat de Catalunya.

Eth Parador d’Arties acuelhie ager er acte de conmemoracion des 40 ans der Espitau Val d’Aran que siguec organizat peth Conselh Generau d’Aran e dubèrt a tota era ciutadania.

Er acte se daurie damb un repàs documentau dera istòria dera sanitat ena Val d’Aran d’Aran en çò que hè ara assisténcia, qu’a mès d’un sègle d’istòria, damb antecedents en Espitau de Sant Nicolau, fondat en 1192, e en espitau de Sant Antòni de Vielha, inaugurat en 1937, gràcies ath legat d’Antonio Abadia Cónsul e Antonia Puyol.

Siguec en 1985, damb era inauguracion der actuau Espitau Val d’Aran, quan s’inicièc ua naua etapa ena istòria dera sanitat aranesa, que siguec possible pr’amor dera perseverància dera societat aranesa representada enes sòns ajuntaments e en Conselh Generau Provisionau dera epòca. Aqueth bastiment siguec eth prumèr espitau hèt pera Generalitat de Catalunya dempús deth traspàs de competéncies en matèria sanitària.

Er an 2002 siguec un des punts d’inflexion ena sanitat aranesa perque, damb eth traspàs de competéncies sanitàries tath Conselh Generau d’Aran, se creèc eth Servici Aranés de Salut, qu’evolucionèc posteriorament en Servici Aranés de Benèster e Salut, en tot refortir era proximitat e era adaptacion des servicis as besonhs dera ciutadania, un des pilars der autogovèrn aranés.

Ath long d’aguesti 40 ans, er Espitau Val d’Aran a consolidat era sua foncion assistenciau e, a trauès deth Servici Aranés de Benèster e Salut, a establit aliances estrategiques damb centres de referéncia, coma damb er Hospital del Mar e damb equipaments sanitaris de França, andues en 2010, qu’an supausat un abans e un dempús ena assisténcia sanitària en nòste país.

En paraules dera directora deth Servici de Benèster e Salut, M. Àngels Borràs “aguesti quaranta ans an estat tanben possibles gràcies ara implicacion e compromís de toti es professionaus que damb eth sòn trabalh hèn possible qu’eth nòste sistèma sanitari e sociau seguisque auançant entà aufrir es melhors servicis ara ciutadania”.

Pendent er acte, se presentèc tanben eth projècte de reforma der Espitau, qu’ei previst que se comencen a bastir en 2026 e que comportarà ua melhora substanciau en çò que hè as espacis e ath benèster de professionaus e usatgèrs, e que serà finançat pera Generalitat de Catalunya.

Fèlix Castells, director de sector dera Region Sanitària der Alt Pirineu e Aran, que participèc der acte en representacion deth CatSalut, destacaue es auanci qu’era Val d’Aran auie hèt en matèria sanitària dera man deth Departament de Salut dera Generalitat.

Er acte siguec clausurat pera sindica d’Aran, Maria Vergés, que manifestèc que “Er Espitau Val d’Aran ei eth resultat d’un esfòrç collectiu que ven de luenh, d’ua comunautat qu’a perseverat entà qu’era sua gent auesse es madeishi drets qu’era rèsta dera ciutadania”, e higie que “Des deth govèrn d’Aran, aué mantenguem eth fèrm compromís damb era societat aranesa entà contunhar bastint eth present e eth futur deth nòste sistèma sanitari e sociau, basat ena proximitat, era equitat e era excelléncia professionau, e qu’ei era garantia d’uns servicis publics ara nautada des besonhs dera gent.”

Vielha, 9 de noveme de 2025