• Laguens deth projècte BòscAran, dera Fundación Biodiversidad deth Ministerio de Transición Ecológica y Reto Demográfico, era setmana passada se heren ues jornades tecniques adreçades as responsables municipaus e ath personau tecnic que da supòrt as entitats locaus proprietàries de bòsqui publics.

Era setmana passada se heren ena Val d’Aran ues jornades tecniques sus era dinamizacion forestau. Eth prumèr dia se presentèc era situacion actuau dera gestion forestau enes bòsqui publics, eth projècte BòscAran, es hilats de calor e era construccion damb husta, e eth foncionament deth cable aerian, a cargue de tecnics deth Centre de Sciéncia e Tecnologia Forestau de Catalonha.

Eth prumèr dia se dediquèc a hèr ua visita practica tath bòsc de Sèuva e Casteret, de Les, a on s’expliquèc era silvicultura aplicada e eth foncionament deth cable aerian ena zòna a on s’amie a tèrme er aprofitament forestau previst en projècte.

Pendent aguesti dus dies, ua quarantea de participants an pogut conéisher de prumèra man es objectius practics deth projècte, centradi sustot ena activacion dera gestion forestau des municipis dera Val d’Aran, damb un modèl que pòt èster replicable en d’autes zònes de montanha.

Actuaument, fòrça ajuntaments son en procès de decidir se comencen o reprenen era gestion des sòns bòsqui entà milhorar era resiliéncia e era resisténcia deth territòri en un contèxte de cambi climatic, entà préner mesures de prevencion d’incendis forestaus, entà refortir era biodiversitat o entà generar activitat economica.

Er exemple dera Val d’Aran, a on i a agut un procès de consens e determinacion politica, planificacion estrategica, contractacion d’engenhaires forestaus dinamizadors, activacion de sollicituds de subvencions entà hèr milhores forestaus, mobilizacion dera husta entà construccion e dera biomassa entath cauhatge de pòbles sancèrs, aplicacion de silvicultura d’avantguarda e de tecniques de mecanizacion adaptades ara montanha qu’apòrte eth Centre de Sciéncia e Tecnologia Forestau, ath delà dera transicion energetica entà arténher era neutralitat d’emissions, constituís un modèl fòrça integrau e reproductible en quinsevolh aute municipi der Estat.

Eth projècte BòscAran

BòscAran ei un projècte transformador entara promocion dera bioeconomia ligada ath sector forestau e entara contribucion ara transicion ecologica. Ei liderat peth Conselh Generau d’Aran e peth Centre de Sciéncia e Tecnologia Forestau de Catalonha (CTFC), en collaboracion damb er Ajuntament de Bonansa e es associacions ELFOCAT e esMontañas, que regropen uns 400 ajuntaments proprietaris de bòsqui.

Eth projècte compde damb eth supòrt dera Fundación Biodiversidad deth Ministerio para la Transición Ecológica y el Reto Demográfico laguens deth Plan de Recuperación, Transformación y Resiliencia (PRTR), finançada peth NextGenerationEU dera Union Europèa.