• “Lo Congrès Permanent de la Lenga Occitana” ei er unic estament academic tar occitan damb reconeishement der Estat Francés e ei er organisme interregionau de regulacion dera lengua occitana.

• Damb er objectiu de revitalizar e desvolopar era lengua occitana, “Lo Congrès” desvolope airines lingüistiques, a metut en plaça un portau web a on propòse ath public diferentes aplicacions numeriques e ressorces lingüistiques coma dicod’Òc (multidiccionari en linha), vèrbÒc (conjugador occitan), tèrmÒc (basa terminologica) o tanben tòpÒc (toponims occitans).

• Era collaboracion entre eth Conselh Generau d’Aran e Lo Congrès a coma objècte era redaccion d’un lexic numeric occitan referenciau/occitan aranés-catalan que permeterà era integracion d’aguest lexic tanben en aranés enes airines digitaus de diccionari en linha dicodÒc e de traductors en linha entà èster consultables peth public.

Eth Conselh Generau d’Aran e “Lo Congrès Permanent de la Lenga Occitana” an signat un convèni de collaboracion qu’a coma objectiu era elaboracion d’un lexic numeric occitan, ena varietat d’occitan aranés e en occitan referenciau, damb equivaléncies en catalan que permeterà qu’er aranés entre a formar part deth diccionari en linha dicodÒc atau coma de d’autes airines que Lo Congrès desvolope entara difusion e revitalizacion dera lengua.

“Lo Congrès” qu’a desvolopat tres encastres de trabalh ar entorn dera tecnologia deth tractament automatic deth lenguatge, entà ajudar a socializar era lengua entre era ciutadania e es empreses, atau coma tara sua regulacion e normalizacion.

Aguest convèni establís qu’ei “Lo Congrès”, damb ua grana experiéncia n’aguestes qüestions, qui s’encuedarà dera redaccion e desvolopament deth lexic, mejançant procèssi tecnics e lexicografics avançadi. Entre es actuacions previstes i é era extraccion automatica d’informacions e parelhs de mots a compdar de lexics ja existents, atau coma era creacion d’un prumèr lexic catalan–occitan referénciau e aranés, entàs dues direccions, damb un volum estimat d’entre 20.000 e 30.000 entrades per cadua.

Eth projècte includís tanben era creacion d’ua plataforma en linha entara redaccion e gestion de lexics, dotada d’ua basa de donades e d’ua interfàcia especifica. Es donades s’integraràn en plataformes coma Apertium, Revirada e Dicod’Òc, entà facilitar-ne era consulta publica.

Damb aguest nau convèni, andues institucions consoliden ua collaboracion iniciada en 2020 e apòsten per un lexic occitan–catalan e catalan–occitan ena varietat aranesa, que serà consultable dera plataforma de Lo Congrès, dera web der aranés (aranes.conselharan.org) e des dera aplicacion En aranés deth Conselh Generau d’Aran.

Entara sindica d’Aran, Maria Vergés, aguest acòrd de collaboracion “assolide era collaboracion deth Conselh Generau d’Aran damb aqueri estaments de reconeishut prestigi lingüistic der aute costat dera termièra coma ei “Lo Congrès” e mos permet hèr un pas fòrça important en procès de digitalizacion des esturments qu’ajuden apropar era lengua ara ciutadania, en tot balhar utisi coma reviradors automatics e diccionaris en linha que possibiliten era universalizacion der emplec dera lengua e, per tant, de hèr-la utila e viua”.

Vielha, 20 de gèr de 2026