Era conselhèra de Salut dera Generalitat, Olga Pané, s’a desplaçat aué entara Val d’Aran en visita institucionau, a on a estat recebuda pera sindica d’Aran, Maria Vergés, entà hèr seguiment deth traspàs de competéncies en airau dera salut.

Eth projècte d’ampliacion e remodelacion der Espitau dera Val d’Aran a estat un des ahèrs mès importanti dera amassada, era tresau que se celèbre damb eth govèrn actuau dera Generalitat n’aguesta legislatura.

Es dues institucions an coïncidit en besonh de contunhar es trabalhs entà auançar en projècte de milhora der equipament sanitari, qu’actuaument se tròbe ena fasa de redaccion, e deth quau se prevé dispausar deth projècte executiu entara fin der an e que contemple era construccion dera naua bastissa der ambulatòri e era remodelacion des espacis der antic edifici.

Ena amassada s’a tractat tanben era dificultat entà captar e fidelizar professionaus sanitaris deth territòri.

Entara sindica d’Aran, Maria Vergés: “Auem tractat dues qüestions importantes, que son era remodelacion der Espitau Val d’Aran, a on es fases 0 e 1 ja son en marcha, e coma tèma primordiau, era fixacion des professionaus entà cercar ua formula que hèsque qu’aqueri professionaus dera sanitat volguen vier tath Pirenèu, entara Val d’Aran, e veir com eth Departament pòt incidir entà que sigue ua realitat”.

Era sindica, Maria Vergés, a hijut: “un aute des ahèrs a tractar passe peth finançament en airau de Salut, qu’atau e com patís era pròpria Generalitat, a encara quauqued mancances a resòler”.

En sòn pas per Aran, era conselhèra acompanhada pera Sindica tanben a visitat er Espitau Val d’Aran, amassa damb es responsables der airau sanitari aranés e dera Region Sanitària deth Pirenèu.