- Aguesta pròva pilòt a coma objectiu qu’aguest bestiar se minge era massa forestau der entorn deth pòble entà redusir eth risc d’incendis recuperant eth paisatge tradicionau, milhorant era biodiversitat e dant supòrt ara ramaderia extensiva.
Ath long des darrèrs ans, era massa forestau a creishut d’ua manèra descontrolada a conseqüéncia dera manca de gestion des nòsti bòsqui e dera dismuncion d’activitats ramadèra. Per aquerò, aguesta massa arbòria, qu’abans ère luenh des nuclis urbans, ara les entornège. Aquerò, hijut ar ascens de temperatures provocat peth cambi climatic, compòrte un aument incessant deth perilh de huec.
En aguest sens, eth bestiar tostemp a gestionat eth paisatge d’Aran, e ei per açò, que damb aguest ramat se vò recuperar e méter en valor es beneficis dera ramaderia extensiva que sanège es bòsqui creant un talhahuec e mos protegis deth risc d’incendis.
Tanben, aguest projècte a coma objectius: testar es naues tecnologies aplicades ath sector primari que permeten eth contròtle dera localizacion e benèster deth bestiar en remòt entà poder facilitar eth trabalh des pastors e pastores, milhorant era sua qualitat de vida, dar valor ath producte obtengut deth bestiar definint ua cadea de valor agroalimentària e finaument, remassar donades e analizar es resultats d’aguest projècte entà demostrar es beneficis dera ramaderia extensiva a trauès dera sciéncia aplicada.
Tot açò, pr’amor que volem reprenent es abilitats des nòsti auantpassats entà hèr er aprofitament des recorsi naturaus damb eth menor impacte e es majors beneficis aplicant es naues tecnologies. Atau madeish, eth conselhèr d’innovacion, Oriol Sala, a destacat que “Volem promòir er intercambi d’experiéncies entre es pagesi damb era incorporacion deth coneishement de tostemp. Mantenguent es meteodologies dera ramaderia e deth trabalh dera tèrra que compden damb sègles de sabiesa, entà adaptar-les as nòsti tempsi”.
Certaments, OVIHUEC.DAT çò que vò arténher ei diversificar era nòsta economia mejançant era potenciacion dera pagesia e er aprofitament de d’auti productes derivadi d’aguesta en tot impulsar eth sector dera carn o dera lèit. Segons era sindica d’Aran, Maria Vergés: “Ovihuec.dat ei fòrça mès qu’un ramat. Aguest projècte de bioeconomia forestau a coma objectiu reequilibrar un espaci a on conviuen realitats diferentes: era agricòla, era ramadèra, era economica, era sociau e era toristica.”
Aguest projècte a estat impulsat peth Conselh Generau d’Aran e er Ajuntament de Vilamòs, e compden damb eth supòrt d’organismes de recerca de prestigi reconeishut. Era entitat coordindora ei er Institut de Recerca i Tecnologia (IRTA) e i participen: eth Centre de Ciència i Tecnologia Forestal de Catalunya (CTFC), eth Centre de Recerca en Economia i Desenvolopament Agroalimentari (CREDA) e era Fundación Centro Tecnológico de la Información i la Comunicación (CTIC). Damb eth finançament dera Fundación Biodiversidad a trauès deth Ministerio de Transición Ecológica y Reto Demográfico.
Vielha, 28 de hereuèr de 2025
