• Aguest dissabte, 2 d’agost, era Associacion Culturau Es Corbilhuèrs de Les celebrarà es mès de 75 ans de dances araneses en Les en ua jornada commemorativa entà méter en valor era aportacion musicau e culturau d’aguesta associacion e de totes es persones que i son e i an estat ath long dera sua istòria.

• Es actes, organizadi pes Corbilhuèrs de Les, compden damb era collaboracion e supòrt deth Conselh Generau, er Ajuntament de Les, er IEI dera Deputacion de Lhèida e des associacions culturaus deth pòble.

Era Associacion Culturau Es Corbilhuèrs hestege es mès de 75 ans de dances araneses en Les, aguest dissabte 2 d’agost, damb diferenti actes commemoratius.

Era jornada començarà tàs 11.00 deth maitin, damb era inauguracion dera exposicion sus lengües minoritàries en Ajuntament de Les e ara seguida, tàs 12.00, s’inaugurarà era exposicion fotografica sus era istòria des Corbilhuèrs, ena sala polivalenta.

Tàs 18.00 ores, Es Corbilhuèrs receberàn ara rèsta de colhès de dances tradicionaus araneses dera Val d’Aran: era Còlha de Santa Maria de Mijaran, Es Fradins de Vielha, es Sautarèths de Bossòst, ena plaça der Ajuntament de Les, e entàs 19.00 se harà un espectacle commemoratiu aufrit pes Corbilhuèrs ena sala polivalenta.

Ath ser i aurà un sopar popular, tàs 21.00 ores, e ara seguida se poirà gaudir d’un concèrt deth grop aranés Sarabat, ena sala polivalenta. Era jornada se barrarà damb ua session de balh de net Era associacion Es Corbilhuèrs a compdat damb eth supòrt deth Conselh Generau d’Aran, er Ajuntament de Les, er IEI dera Deputacion de Lhèida e es associacions culturaus deth pòble.

Un acte dubèrt a tota era ciutadania e fòrça especiau que recorrerà era istòria des dances aht long des ans.