• Es naues mesures son eth resultat d’ans de trabalh conjunt entre eth Conselh e es associacions ramadères dera Val d’Aran, en espacis coma era taula de trabalh Espai Òs.

• Aguestes prepauses se materializen ara en ua normativa que supause un pas important entà garantir era viabilitat dera ramaderia de montanha.

Eth Conselh Generau d’Aran avalore fòrça positivament era aprobacion deth Decret lei 21/2025, de 14 d’octobre, de mesures urgentes de supòrt ath sector agrari e forestau, publicat recentament en DOGC. Aguest nau marc normatiu incorpòre melhores substanciaus enes compensacions pes maus provocadi pera fauna sauvatja protegida enes explotacions ramadères, ua reivindicacion istoricament reclamada en territori aranés.

Es principaus novetats deth decret son:

Aument des impòrts indemnizadi

Es prètzi des compensacions s’an actualizat e adaptat ara normativa estatau vigenta entàs assegurances agràries, damb un aument qu’oscille entre eth 45% e eth 60%.
Ath delà, se reconeishen increments especifics entàs races autoctònes e se compensen es còsti indirèctes, coma eth temps destinat ara recèrca deth bestiar o es desplaçaments.

Incorporacion deth lucre cessant

Ua des demanes mès importantes deth sector qu’ara fin a estat incorporada.
Eth lucre cessant prevé era pèrta de benefici que supause entà un ramadèr non poder explotar ua femelha productiva atacada, en tot demorar era sua reposicion.
Eth decrèt includís tanben era compensacion entàs cries que aguesta femelha aurie podut auer pendent eth periòde de reposicion, en concepte de venda, produccion leitèra o produccion de mèu.

Compensacion totau pes maus indirèctes

Enquia aué, aguesti maus se compensauen ath 75%. Damb era naua normativa, se passe ath 100%, reconeishent en toti es sòns tèrmes situacions coma espatlaments o d’autes conseqüéncies derivades directament d’un atac constatat.

Ua melhora significativa tath sector

Damb aguest nau decrèt, se hè un pas endauant entà ua justícia e equitat mès grana entàs ramadèrs qu’an d’adaptar-se ara preséncia dera fauna sauvatja enes zònes de montanha. Eth Conselh Generau d’Aran trabalharà entà garantir era compatibilitat entre era conservacion deth mèdi naturau e era subervivéncia deth sector ramadèr tradicionau.

“Aguestes melhores son era responsa justa ara realitat que hè temps patís eth nòste sector ramadèr. Ei essenciau qu’es ramadèrs agen eth supòrt e es garanties de besonh entà contunhar damb era sua activitat”, a declarat eth conselhèr de Territòri, Francisco Bruna.

Vielha, 20 d’octubre de 2025