• Deuant des rèptes qu’era Val d’Aran afronte damb es efèctes deth cambi climatic e des cambis en modèl socioeconomic, qu’a transformat eth paisatge aranés, eth Govèrn d’Aran a presentat as alcaldes deth territòri es bases deth que serà eth Plan d’Accion tà protegir es pòbles contra es huecs de siesau generacion e, ath madeish temps, recuperar era gestion paisatgistica a trauès dera gestion forestau, era implementacion de carga ramadèra, era metuda en valor deth producte agroalimentari e era innovacion.

Eth Govèrn d’Aran presentèc ager as alcaldes aranesi era prepausa entà desvolopar eth Plan tara melhora e gestion deth paisatge e tara proteccion des entorns des pòbles.

Aguest plan vò desvolopar tota ua estratègia que permete, non sonque diversificar eth paisatge aranés, melhorar-ne era gestion e aumentar era biodiversitat, senon tanben implementar es accions qu’ajuden a protegir es pòbles dera Val d’Aran deuant deth risc d’incendis de siesau generacion.

Era sindica d’Aran, Maria Vergés, expliquèc qu’aguest plan se dessenhe de manèra transversau entre es departaments de Miei Ambient e Ramaderia, Innovacion, Emergéncies e Proteccion Civila e Promocion Economica dera maxima institucion, entà profitar era experiéncia e coneishements tecnics qu’eth Conselh Generau d’Aran a aquerit en desvolopar diuèrses accions e projèctes qu’an a veir damb era gestion deth territòri.

D’un costat, per çò que hè ar encastre dera proteccion contra es huecs, se compde damb aquerò que ditz eth “Plan de Gestion Sostenibla deth Huec”, impulsat per Pompièrs Emergéncies e damb eth supòrt des GRAF dera Generalitat. E, der aute, se compde damb es dades dera implementacion deth projècte de ramat municipau “Ovihuec.dat” e dera gestion forestau que s’amie a tèrme a trauès deth projècte BòscAran, qu’an balhat fòrça informacion sus coma desvolopar aguest tipe d’estratègies, ath madeish temps qu’an dessenhat formules administratives que permeten aguesta gestion, entre d’autes, modèls d’ordenances municipaus tà qu’es Ajuntaments poguen regular eth manteniment des finques privades des entorns des pòbles per part des proprietaris e, en cas qu’açò non se hèsque, que permeten era intervencion dera administracion.

Er objectiu deth plan ei, en prumèr lòc, era analisi deth comportament deth huec entà cada pòble, en tot hèr es estimacions d’intensitat, velocitat… e tipificar era vegetacion segontes es modèls de combustible. Posterioraments, se tractarà de hèr es intervencions de neteja d’aqueri entorns per orde de prioritat, entà, finauments, establir-i carga ramadèra qu’assegure eth manteniment d’aqueri entorns e, qu’ath viatge, diversifique era economia e permete era metuda en valor deth producte carnic, tot açò dera man deth sector ramadèr que se i volgue acuélher.

“Aguest plan vò anar mès enlà des pròpris plans d’actuacion municipaus, que son obligatòris entàs ajuntaments e qu’aguest plan non pòt substituïr, senon que preten ua gestion integrau deth territòri d’Aran que, ath delà de protegir, permete desvolopar activitat economica enes pòbles”, manifestaue era sindica d’Aran.

Ath long des setmanes que vien, eth Conselh Generau d’Aran harà a arribar ua prumèra prepausa as ajuntaments en relacion damb er acòrd tara gestion forestau, entà plantejar ua collaboracion entre Conselh e ajuntaments que permete aguestes accions en tot establir linhes d’ajuda e eth dessenh conjunt des estratègies en cada municipi que se volgue híger ad aguest plan.

Aguesta iniciativa se hig ara estratègia deth Govèrn d’Aran per çò que hè ara gestion deth territòri, mercada tanben pera modificacion des NNSS de Planejament que regularàn es usatges e es construccions admissibles en sòu non urbanizable e s’includís laguens des acccions der acòrd de cession dera gestion forestau damb es ajuntaments aranesi.

Vielha, 15 d’octobre de 2025