• Un projècte que forme part deth Plan de Sostenibilitat tath foment deth torisme entà méter en valor es elements culturaus e naturaus d’Aran.

Ager s’inauguraue oficiaument era rota tematica de Bossòst, era dusau des tres rotes impulsades peth Conselh Generau d’Aran en Baish Aran.

Aguesta naua rota, coneishuda coma «Aran Sauvatge, Fauna d’Aran», ei un recorrut que permet conéisher es diferenti elements d’interès dera fauna, es relacions ecosistemiques entre es pòbles dera Val e eth sòn entorn naturau.

Er acte d’inauguracion siguec presidit pera sindica d’Aran, Maria Vergés, acompanhada per d’auti conselhèrs deth govèrn aranés e pera alcaldessa de Bossòst, Montserrat de Burgos.

Maria Vergés a remercat «qu’aguesti projèctes son un esturment clau entà dinamizar eth torisme de manèra sostenibla, entà fomentar er interès pes aspèctes culturaus e naturaus dera Val d’Aran, sense pèrder de vista era preservacion e eth respècte peth territòri».

Era rota ‘Aran sauvatge, Fauna d’Aran’ ei “ua oportunitat entà conéisher milhor es ligams entre es persones e era natura, e promòir un torisme respectuós damb eth mèdi ambient”, a relheuat Maria Vergés.

Era rota ei dessenhada entà aufrir un recorrut de facil accès, damb senhalizacions interpretatives e punts d’interès que permeten as visitaires descorbir qüestions qu’an relacion damb era fauna e era flòra deth territòri.

Aguest projècte ei includit en Plan de Sostenibilitat tath Foment deth Torisme deth Conselh Generau d’Aran, que vò diversificar era aufèrta toristica dera Val d’Aran, promòir er usatge responsable des recorsi naturaus e fomentar ua major comprension e estimacion peth patrimòni culturau e ambientau.

Entà completar aguest projècte, en Les s’inaugurarà era tresau des rotes tematiques, titolada “Castèth de Les, ua passejada pera istòria d’Aran”.

Vielha, 19 d’agost 2025