• Eth govèrn d’Aran posse, dera man deth Centre Tecnologic Forestau de Catalunya (CTFC), quate projèctes entà instalar hilats de calor urbans alimentadi pera biomassa des bòsqui aranesi, en quate municipis dera Val d’Aran: Arròs e Vila, Bagergue, Es Bòrdes e Les.

Laguens dera estrategia de gestion territoriau impulsada peth govèrn d’Aran, era maxima institucion aranesa trabalhe, amassa damb eth CTFC en diuèrsi estudis de viabilitat entath desplegament de hilats de calor en quate pòbles aranesi que, a trauès de caudères de biomassa publiques, permeten era conexion deth nucli urban ad aguesta hònt d’energia renauibla.

Atau donc, damb er aprofitament des recorsi forestaus deth territòri entà generar energia termica se promò un modèl energetic sostenible e circular

Damb aguest projècte entà estudiar era installacion de hilats urbans de calor alimentadi per biomassa forestau enes localitats d’Es Bòrdes, Arròs e Vila, Bagergue e Les, “se preten méter en valor era biomassa provenenta des bòsqui publics, entà generar energia termica e provedir de calefaccion a diuèrsi nuclèus de populacion, en tot hèr possible un modèl energetic circular, eficient e respectuós damb eth miei ambient, qu’ath delà genère tanben ua naua economia enes nòsti pòbles” manifestaue era sindica d’Aran, Maria Vergés.

Eth Conselh Generau d’Aran a licitat es estudis de viabilitat tecnica, economica e ambientau, damb un pressupòst de 60.500 euros, entà determinar es possibilitats reaus d’implementacion des hilats e optimizar eth sòn dessenh e foncionament.

Entath conselhèr d’Infraestructures e Òbres deth Conselh Generau, José Luis Boya: “Es trabalhs forestaus se planifiquen tostemps damb er objectiu de milhorar es bòsqui, considerant es besonhs actuaus des madeishi, tà hèr front as naui rèptes que plantege eth cambi climatic e garantir en tot moment eth respècte e milhora deth patrimòni naturau dera Val d’Aran”.

Vielha, 22 d’octobre de 2025