Eth Conselh Generau d’Aran a renauit es dus convènis de collaboracion, que mantié damb era Associacion Esportiva Baish Aran e era Union Esportiva Bossòst, damb er objectiu de garantir eth supòrt continuat as activitats esportives deth territòri.

Er objectiu des dus convènis ei establir un marc de collaboracion que permete continuar damb es activitats e assegurar era viabilitat deth teishit esportiu local, tanben des categories inferiores ara prumèra equipa. Entath conselhèr d’Espòrts, Javier Cavero, “a trauès d’aquesta aliança, eth Conselh Generau vò reforçar era sua apòsta per espòrt coma airina integradora e saludabla entara joenessa dera Val, en aguest cas centrada en fotbòl.»

Cada ua des associacions receberà ua compensacion economica de quate mil euros en cors 2025-2026.

Aguesti acòrds an tanben coma finalitat garantir era continuïtat d’aguesta practica esportiva en territòri, contribuïnt ath manteniment d’aguesta tradicion istorica, sustot en Baish Aran.