Era Val d’Aran compde d’aguesta setmana ençà damb eth servici de IVE farmacologica

  • Damb era incorporacion dera interrupcion voluntària der embaràs (IVE) farmacologica ena cartera der Espitau Val d’Aran, eth govèrn deth Conselh Generau d’Aran da un pas important entà garantir es drets des hemnes laguens deth territòri

Aran Salut a recebut aguesta setmana era autorizacion sanitària pertinenta entà poder realizar en Espitau Val d’Aran eth procediment d’interrupcion voluntària der embaràs (IVE) per via farmacologica, un servici sanitari que a compdar d’aguest dimèrcles ei dejà disponible entàs hemnes deth nòste territòri.

“Aguesta ère ua reclamacion de fòrça hemnes en Aran e, per aguest motiu, eth govèrn deth Conselh Generau d’Aran a trabalhat es darrèri mesi entà poder arténher era autorizacion sanitària e evitar que, coma succedie enquiara, es hemnes se trapen deuant d’aguesta dificil situacion auessen de trasladar-se tà d’auti terriròri, especiaument tà Lleida”, afirmaue era sindica d’Aran, Maria Vergés, en tot híger que: “entàth nòste govèrn, garantir es drets des hemnes ei un ahèr primordiau e damb aguest nau servici dam un important pas en aguest ambit, qu’enquiath moment non s’auie abordat”.

Damb era incorporacion d’aguest servici laguens dera sua cartèra, er Espitau Val d’Aran se convertís en darrèr centre sanitari deth Pirenèu en aufrir aguesta IVE farmacologica.

Comments are closed.