Eth Conselh d’Aran commemòre eth Dia Internacionau contra era Violéncia de Genre damb diuèrsi actes ath long d’aguesti dies

Era lectura d’un manifèst contra era violéncia de genre daurís es actes commemoratius deth 25 de noveme, dia Internacionau contra era Violéncia de Genre

25N 0

Eth Conselh Generau d’Aran, per miei deth Servici d’Informacion e Atencion ara Hemna (SIAH), commemòre eth Dia Internacionau contra era violéncia de genre damb diuèrsi actes, qu’auràn lòc es pròplèu dies. Entà daurir es actes commemoratius, era plaça deth Conselh Generau d’Aran a acuelhut era lectura d’un manifèst de refús ara violéncia de genre a cargue eth conselhèr de Salut e Benéster d’Aran, Eduardo Valdecantos.

En paraules de Valdecantos “des deth Govèrn d’Aran, auem era obligacion de crear consciéncia sus aguesta violacion as drets umans. Auem de contunhar balhant especiau atencion e dedicacion tà eradicar era violéncia contra era hemna, mejançant eth compliment des objectius en egalitat de genre, desvolopament e patz”.

Ara seguida dera lectura s’an alugat candèles coma mòstra de solidaritat damb es victimes, tanben s’a presentat eth vidèo “Aran trinque es cadies” e s’a aufrit ua chicolotada as assistents.

25 N1

Es actes an compdat damb lèu un centenat de persones, ath delà dera preséncia dera conselhèra de Torisme, Comèrç e Consum, Anna Díaz, deth cossò d’Espòrts der Ajuntament de Vielha e Mijaran, Agustí Calbetó e dera cossò der Ajuntament de Vielha e Mijaran, Luisa Estévez.

Entà barrar es actes commemoratius, eth diuendres, dia 28 de noveme, entàs 19h00, ena sala de premsa deth Conselh Generau d’Aran ,Yolanda Bardina (agent de prevencion des relacions abusives) dera asociacion LIKA, realizarà era charrada “Les trampes ocultes de la violència de gènere”.

Comments are closed.